वाशीम  ः जिल्ह्यात या खरीप हंगामात नुकसान झालेल्या मूग, उडीद या पिकांसाठी कंपनीने विमा मंजूर केला आहे. जिल्ह्यातील १० हजार ६१ शेतकऱ्यांना ८१ लाख ४१ हजार ८८ रुपये विमा मंजूर केला आहे. सोयाबीन उत्पादक शेतकऱ्यांना अद्यापही विमा मिळण्याची प्रतीक्षा लागलेली आहे. जिल्ह्यात अवकाळी पावसामुळे पिकांचे मोठे नुकसान झालेले आहे. त्यामुळे शेतकरी सर्वच पिकांच्या नुकसानभरपाईची प्रतीक्षा करीत आहेत. विमा कंपनीकडून मूग, उडीद पिकांसाठी सामुदायिक क्लेम मंजूर करण्यात आला आहे. उंबरठा उत्पन्नाच्या आधारावर ही विमा रक्कम मंजूर  झाली आहे.  जिल्ह्यातील २७ हजारांवर शेतकऱ्यांनी मूग, उडीद पिकांचा विमा काढला होता. यासाठी ४७ लाख ५७ हजार ४४२ रुपये विमा हप्ता भरण्यात आला. विमा कंपनीने सामुदायिक स्तरावर या दोन्ही पिकांसाठी क्लेम मंजूर केला. याचा १० हजार ६१ शेतकऱ्यांना लाभ मिळणार आहे. यासाठी ८१ लाख ४१ हजार रुपये विमा रक्कम मंजूर करण्यात आली असून, शेतकऱ्यांच्या खात्यात वितरित केली जात आहे.  उडीद पिकासाठी कारंजा तालुक्यात २०३४, मालेगाव ८६७, मंगरुळपीर ३३८९, मानोरा ७५२ असे एकूण ७०४२ शेतकऱ्यांना तर मूग पिकासाठी कारंजा तालुका १६७९, मालेगाव तालुका १५५, मंगरुळपीर तालुका ११८५ असा एकूण ३०१९ शेतकऱ्यांना विम्याचा लाभ दिला जाणार आहे. या दोन्ही पिकांच्या १० हजार ६१ शेतकऱ्यांना पीकविम्याचा लाभ मिळत आहे.