टाकळी ढोकेश्वर, जि. नगर  ः पारनेर तालुक्यातील करंदी, कान्हूरपठार परिसरातील गणपती फाटा रोडवरील झाडे बुधवारी (ता.२२) वादळी वाऱ्यामुळे पडल्याने पारनेर-कान्हूरपठार रोडवरील वाहतुक तीन तास ठप्प झाली होती. या भागात काही प्रमाणात पाऊस झाला.

बुधवारी सायंकाळी पाच वाजेदरम्यान वादळी वा-यासह पाऊस सुरू झाल्याने घरांवरील पत्रे उडल्याने नुकसान झाले आहे. करंदी येथील विश्वनाथ गव्हाणे यांच्या घराचे पत्रे उडल्याने त्यांचे मोठ्या प्रमाणात नुकसान झाले. घटनास्थळी करंदीचे उपसरपंच भास्कर गव्हाणे यांनी भेट देऊन झालेल्या नुकसानीची पाहणी केली आणि याबाबतची माहिती प्रशासनाला देऊन या नुकसानीचा पंचनामा करण्यास सांगितले. कान्हूरपठार येथील भागवतमळा परिसरातील वरूंडीमाता रोडवरील महावितरणचा ट्रान्सफॉर्मर वादळी वाऱ्यांमुळे उन्मळून पडला.

करंदी रोडवरही मोठ्या प्रमाणात झाडे पडल्याने तो रस्ता वाहतूकीसाठी बंद होता. पारनेर व टाकळी ढोकेश्वर येथे जाणारी सर्व वाहतूक विरोलीमार्गे ग्रामस्थांनी वळविल्याने काही काळ वाहतूक सुरळीत झाली. कान्हूरपठार परिसरातील स्वप्निल सोमवंशी यांच्या आंबा पिकाचे मोठे नुकसान झाले असून या नुकसानीचे पंचानामे करण्याची मागणी शेतक-यांनी केली आहे.