सातारा ः महाबळेश्वरात मुसळधार पाऊस सुरू आहे. गूरूवारी सकाळी आठ पर्यंतच्या २४ तासात ४८० मिलिमीटर पावसाची नोंद झाली आहे. महाबळेश्वर सर्वाधिक पाऊस होण्याची दुसरी वेळ असून सर्वाधिक पाऊस आॅगस्ट २००८ मध्ये झाला असल्याची माहिती महाबळेश्वर येथील मौसम विभागा कार्यालयाकडून देण्यात आली आहे. 

महाबळेश्वरात धुवांधार पाऊस कोसळत आहे. मुसळधार पावसाने सर्वच रस्ते जलमय झाले आहेत. महाबळेश्वरात सर्वाधिक पाऊस होण्याची दुसऱ्या नंबरची आकडेवारी आहे. या अगोदर सर्वाधिक पाऊस ११ आॅगस्ट २००८ रोजी ४९०.७ मिलीमीटर पाऊस झाला होता. त्यानंतर गूरूवारी (ता.२२) सकाळी साडेआठ पर्यंतच्या २४ तासात ४८० मिलीमीटर पाऊस झाला आहे. या पावसामुळे महाबळेश्वर - पांचगणी मुख्य रस्त्यावर वेण्णालेक नजिक पाणीच पाणी झाले. वेण्णा लेक ते लिंगमळा परिसरात सर्वत्रच पाणीच पाणी झाल्याचे चित्र होते. शेतीसह अनेकांच्या घरात या परिसरातील हॉटेल ढाब्यांमध्ये पाणी गेले होते. काही ठिकाणी संरक्षक भिंती, लाईट चे खांब कोसळल्याच्या घटना देखील घडल्या. महाबळेश्र्वर प्रतापगड रस्त्यावरील धबधबे ओसंडून वाहत असून घाटरस्त्यावर संपूर्ण पाणीच पाणी होते. हा संपूर्ण रस्ताच धोकादायक झाला आहे. महाबळेश्वर तालुक्यातील चतुर बेट व उचाट येथील पुल पाण्याखाली गेल्याने २८ गावांचा संपर्क तुटला आहे.