सातारा  ः जिल्ह्याच्या पश्‍चिम भागातील महाबळेश्वर, पाटण, जावली, सातारा, वाई या तालुक्‍यांत पावसाचा जोर कायम आहे. कोयना धरण क्षेत्रातही दमदार पाऊस सुरू असल्याने धरणातील पाणी पातळीत वाढ झाली आहे.

जिल्ह्यात सोमवारी (ता. ९) सकाळी आठ वाजेपर्यंत सरासरी १३.९ मिमी पावसाची नोंद झाली आहे. महाबळेश्वर तालुक्‍यात पावसाचा सर्वाधिक जोर असून, या तालुक्‍यात ८०.५ मिमी पाऊस झाला आहे. तसेच, जावली व पाटण तालुक्‍यांतही दमदार पाऊस सुरू आहे. सातारा, कराड, वाई, कोरेगाव व खटाव या तालुक्‍यांत पावसाच्या अधूनमधून सरी कोसळत आहे.

सोमवारी सकाळी पावसाचा जोर काहीसा कमी झाला आहे. दुष्काळी फलटण, माण, खंडाळा या तालुक्‍यांत शेतकऱ्यांना पावसाची प्रतीक्षा कायम आहे. कोयना धरण क्षेत्रात पावसाच्या दमदार सरी कोसळत आहे. या धरण क्षेत्रातील कोयना येथे ९२, नवजा येथे ७३, महाबळेश्वर येथे ८६ मिमी पाऊस झाला असून, सोमवारी सकाळपर्यंतच्या २४ तासांत धरणात साठ्यात १.९४ टीएमसीने वाढ झाली आहे. धरणात सोमवारी सकाळी आठ वाजेपर्यंत एकूण ४३.७० टीएमसी म्हणजेच ४१.५२ टक्के साठा होता.