जळगाव : यंदाच्या खरिपात ज्वारी, बाजरीचे उत्पादन व कडबा हवा तसा आला नाही. तसेच सध्या मागील रब्बीमधील दादरचा कडबा व कुट्टी मिळणे दुरापास्त झाले आहे. कडब्याचा तुटवडा जाणवत असून, यामुळे त्याची दरवाढ झाल्याचे चित्र आहे. दादरची कुट्टी तर ४२०० रुपये प्रतिशेकडा या दराने मिळू लागली आहे.

 

कडब्यासह पशुखाद्याचे दर वाढल्याने दूध उत्पादकांचा उत्पादन खर्च वाढला आहे. मक्‍याचा चाराही पुरेसा नाही. येथील बाजार समितीच्या पशुधन बाजारानजीक कडबा व कुट्टी विक्रेते आहेत. मका, ज्वारी आणि दादरची कुट्टी या विक्रेत्यांकडे मिळते. परंतु त्यात दादरची १०० पेंढ्यांची कुट्टी ४२०० रुपयांपेक्षा अधिक दरात मिळत आहे.मक्‍याची १०० पेंढ्यांची जुनी कुट्टी १८०० रुपयांपेक्षा अधिक दरात मिळत असल्याची माहिती मिळाली.

 

जुनी व नवी ज्वारीची कुट्टी देखील मिळणे दुरापास्त झाले आहे. रावेर, यावल, चोपडा, जामनेर व पाचोरा येथील काही भागात ज्वारीचे पीक बरे आले. परंतु संबंधित शेतकऱ्यांनी हा चारा न विकता तो आपल्या पशुधनासाठी साठविला आहे. त्यामुळे ज्वारीचा कडबा बाजारात फारसा आलेला नाही. सोयाबीन काढणीतून येणारा भुसाही आता संपत आला आहे. तुरीचा कोरडा पाला अजून यायला सुरवात झालेली नाही. तर माळरानातील किंवा शेताच्या बांधावरील गवतही संपले आहे. नवा चारा येण्यास अजून दोन ते अडीच महिने कालावधी आहे. 

 

सध्या सरकी ढेपचे दर १३५० ते १४०० रुपये प्रति ७० किलो आहेत. मध्यंतरी पशुखाद्याचे दर आवाक्‍यात होते, परंतु कपाशीचे दर वाढल्याने सरकी ढेपचे दर स्थिर आहेत. तसेच इतर पशुखाद्याचे दरही स्थिरच असल्याची माहिती मिळाली.