बुलडाणा ः महाविकास आघाडी सरकारने जाहीर केलेली दोन लाखांपर्यंतची कर्जमाफी आम्हाला मान्य नाही. त्यामध्ये सुधारणा करून शेतकऱ्यांची सरसकट कर्जमाफी करावी, अशी मागणी स्वाभिमानी शेतकरी संघटनेने केली आहे. या संदर्भात स्वाभिमानीचे नेते माजी खासदार राजू शेट्टी व रविकांत तुपकर यांनी विधानसभा अध्यक्ष नाना पटोले यांची नागपूर येथे भेट घेऊन त्यांच्याशी चर्चा केली. 

या संदर्भात विधानभवनात मुख्यमंत्री, उपमुख्यमंत्री यांच्यासोबत बैठक बोलावून तोडगा काढण्याचे आश्वासन या वेळी नाना पटोले यांनी दिले.

दोन लाखांपेक्षा अधिक कर्ज असलेल्या शेतकऱ्यांनाही कर्जमाफीचा लाभ मिळाला पाहिजे. २०१५ नंतरच्या थकीत शेतकऱ्यांना याचा लाभ दिला जाणार आहे. मात्र, त्यापूर्वीच्या थकीत कर्जदार शेतकऱ्यांचीही कर्जमाफी करणे आवश्यक आहे. सत्तेत सहभागी असलेल्या तिन्ही पक्षांनी शेतकऱ्यांचा सातबारा कोरा करण्याचे आश्वासन दिले होते. त्यामुळे त्यांनी दिलेला शब्द पाळत सातबारा कोरा करावा. तसेच नियमित कर्ज भरणाऱ्या शेतकऱ्यांचाही सकारात्मक विचार झाला पाहिजे, अशी मागणी या वेळी शेट्टी आणि तुपकर यांनी नाना पटोले यांच्याकडे केली.

विदर्भातील मागील दोन वर्षांपासून दुष्काळी स्थिती होती. त्यामुळे शेतकरी आत्महत्या अधिक आहेत. त्यासाठी विदर्भातील सगळ्याच शेतकऱ्यांना कर्जमाफीचा लाभ मिळणे आवश्यक आहे. मात्र, शासनाने जाहीर केलेल्या कर्जमाफीत विदर्भातील शेतकऱ्यांना न्याय मिळणे शक्य नाही, ही बाब देखील यावेळी तुपकरांनी नाना पटोले यांच्या निदर्शनास आणून दिली.

शेतकऱ्यांना दोन लाखांपर्यंत कर्जमाफी देण्याची घोषणा मुख्यमंत्री ठाकरे यांनी केली आहे. मात्र, ही कर्जमाफी तोकडी असून समाधानकारक नसल्याने सदर कर्जमाफी मान्य नाही.  — राजू शेट्टी,  स्वाभिमानी शेतकरी संघटना