नांदेड : शेतकऱ्यांनी शेतकरी गट तसेच शेतकरी उत्पादक कंपन्या स्थापन करून शेतीमालावर प्रक्रिया करावी, अशा शेतीमालाचे ब्रँडिंग करून शेतकरी ते ग्राहक थेट विक्रीचे नियोजन करावे. यासोबतच स्मार्ट योजनेअंतर्गत ३१ डिसेंबरपर्यंत अर्ज करावे, असे आवाहन जिल्हा अधीक्षक कृषी अधिकारी रविशंकर चलवदे यांनी केले.

देगलूर येथे कृषी विभागाच्या वतीने जिल्हा मासिक चर्चासत्र व प्रक्षेत्र भेटीचे आयोजन मंगळवारी (ता. २२) करण्यात आले होते. या वेळी ते बोलत होते. या वेळी वसंतराव नाईक मराठवाडा कृषी विद्यापीठाचे विभागीय विस्तार कृषी विद्यावेत्ता अरुण गुट्टे, पोखर्णी कृषी विज्ञान केंद्राचे प्रमुख शास्त्रज्ञ डॉ. देविकांत देशमुख, सगरोळी कृषी विज्ञान केंद्राचे प्रमुख शास्त्रज्ञ सुरेश कुलकर्णी, देगलूर उपविभागीय कृषी अधिकारी एम. के. सोनटक्के, देगलूर तालुका कृषी अधिकारी शिवाजी शिंदे यांच्यासह सर्व तालुका कृषी अधिकारी, मंडळ कृषी अधिकारी, देगलूर तालुक्यातील कृषी विभागातील क्षेत्रीय कर्मचारी उपस्थित होते. कार्यक्रम यशस्वी करण्यासाठी मंडळ कृषी अधिकारी सोमेश्‍वर गिरी, माधव सोनकांबळे, कृषी सहायक माने, पैलवाड, यन्नावार, पोतदार, कोनगुलवार, हंगीरगेकर, आचमारे, जायभाये यांनी प्रयत्न केले.

रब्बी पिकांची पाहणी प्रक्षेत्र भेटीदरम्यान करडई, धने, ज्वारी, हरभरा या पिकांची पाहणी केली. त्याचबरोबर पेरू, सीताफळ या फळपिकांची तसेच जेरेनियम या सुंगधी वनस्पती शेतीची पाहणी करण्यात आली. यादरम्यान शेतकऱ्यांशी चर्चा करून मार्गदर्शन करण्यात आले. शेततळे व त्यातील मत्स्यपालन याचीही पाहणी करण्यात आली. याप्रसंगी कृषी विद्यापीठाचे अरुण गुट्टे यांनी पिकांचे कीड व रोग व्यवस्थापनावर मार्गदर्शन केले.