अकोला ः सध्या राज्यात केवळ एफएक्यू दर्जाचाच कापूस खरेदी केला जात असल्याने प्रत्येक शेतकऱ्याकडे असलेल्या उर्वरित कापसाचे करायचे काय, असा प्रश्‍न तयार झाला आहे. एफएक्यू वगळता इतर दर्जाच्या कापसाचे प्रमाण हे अधिक असल्याने मोठा पेच असून शासनाने सरसकट खरेदी करावी, अशी मागणी होत आहे. या बाबत शासनकर्त्यांचे लक्ष वेधण्यासाठी शेतकरी संघटनेने गुरुवारी (ता. ३०) लोकप्रतिनिधी, मंत्र्यांना अलर्ट करण्यासाठी फोन करण्याचे, एसएमएस पाठविण्याचे आंदोलन पुकारले आहे. 

शेतकऱ्यांकडे असलेला नॉन एफएक्यू कापूस सीसीआय तसेच पणन महासंघाने खरेदी करावा, अशी मागणी अनेकांनी करूनही अद्याप शासनाकडून कुठलाही तोडगा काढण्यात आलेला नाही. यामुळे लॉकडाऊनच्या काळात रस्त्यावर न उतरता आंदोलनाचा इशारा दिला आहे. हे आंदोलन गुरुवारी दिवसभर केले जाईल. यात प्रत्येक शेतकऱ्याने सहभागी होण्याचे आवाहन शेतकरी संघटनेने केलेले आहे. लॉकडाऊन सुरू असल्याने कापूस खरेदी बंद पडली होती. 

आता कापूस खरेदी सुरू झाली तरी केवळ एफएक्यू दर्जाचाच कापूस घेतला जात आहे. त्यामुळे प्रत्येक शेतकऱ्याकडील केवळ २० ते ३० टक्केच कापूस पात्र ठरत आहे. व्यापारीसुद्धा कापूस घ्यायला तयार नाहीत. यंदा अतिवृष्टी, पावसाच्या तडाख्यात कापसाचे मोठे नुकसान झाल्याने दर्जा घसरलेला आहे. अशा स्थितीत शेतकऱ्यांनी इतर कापसाचे काय करायचे, असा प्रश्‍न पडलेला आहे.

असे करणार आंदोलन  गुरुवारी आंदोलनात शेतकऱ्यांनी रस्त्यांवर न उतरता प्रत्येकाने स्वतःच्या घरीच थांबून त्यांच्या जिल्ह्यातील लोकप्रतिनिधींना, मंत्र्यांना, संबंधित अधिकाऱ्यांना दिवसभर फोन करून, एसएमएस पाठवून शेतकऱ्यांचा नॉन एफएक्यू कापूस खरेदी करण्याची मागणी करायची आहे, असे आवाहन शेतकरी संघटनेचे युवा आघाडीचे राज्य अध्यक्ष सतीश दाणी, सोशल मीडिया राज्य प्रमुख विलास ताथोड यांनी केले आहे.