येवला, जि. नाशिक : येवला तालुका सतत दुष्काळी असूनही शासनाच्या चुकीच्या माहितीमुळे जायकवाडीला पाणी देता यावे, याकरिता ते पाणी कारखानदारांना वापरण्यासाठी येवला तालुक्याचे नाव दुष्काळी तालुक्यांच्या यादीतून वगळण्यात आले आहे. शासनाचा हा डाव येथील शेतकरी हाणून पाडल्याशिवाय राहणार नाही, असे प्रतिपादन जलहक्क संघर्ष समितीचे संयोजक भागवत सोनवणे यांनी केले.

पाणीलढा लढण्यासाठी पालखेड डावा कालवा कृती समिती स्थापन करण्यात आली आहे. सोनवणे हे पालखेड कालवा कृती समितीचे निमंत्रक असून पालखेड परिसरातील सर्व शेतकरी बांधव या कृती समितीचे सदस्य राहणार आहेत. एरंडगाव येथील पालखेड वसाहतीच्या आवारात रविवारी (ता. २१) कृती समितीची पहिली बैठक झाली. या वेळी लाभ क्षेत्रातील शेकडो शेतकऱ्यांनी एरंडगाव येथे सरकारचा निषेध करून हक्काचे पाणी मिळालेच पाहिजे अशा घोषणा दिल्या. या वेळी प्रहार शेतकरी संघटनेचे तालुकाध्यक्ष हरिभाऊ महाजन, शेतकरी संघटनेचे अनिस पटेल, एकनाथ गायकवाड, शेरू मोमीन आदींनी मार्गदर्शन केले.

सोनवणे म्हणाले, ‘‘केवळ तहसील कार्यालय आवारातील पर्जन्यमापकावरील नोंदी घेतल्या गेल्याने ही चुकीची माहिती शासनाकडे गेली आहे. केवळ शहरासह नजीकच्या गावचा पाऊस गृहीत धरून येवल्याला दुष्काळाच्या यादीतून वगळले आहे. वास्तविक नगरसूल, अंदरसूल या महसूल मंडळातील सर्व जलाशय कोरडे असून, नदीपात्रही कोरडे आहे. सरासरीच्या निम्माही पाऊस झालेला नाही. या परिसरात भीषण पाणीटंचाई, चाराटंचाई जाणवत आहे. अशा परिस्थितीत पालखेड डाव्या कालव्याची दोन आवर्तने ही आपल्या हक्काची असून, ती मिळालीच पाहिजे. त्यासाठी रस्त्यावर चक्काजाम करण्याबरोबरच न्यायालयातही धाव घेण्यात येईल.`` या प्रसंगी प्रभाकर रंधे, रतन मढवई, सुनील साताळकर, भगवान ठोंबरे, नवनाथ लभडे, विठ्ठल वाळके, सीताराम गायकवाड, बाळासाहेब गायकवाड, वसंत झांबरे, महेबूब शेख आदी उपस्थित होते.