रिसोड जि. वाशीम ः तालुक्यात यंदा पावसाने चांगली साथ दिल्याने शेतकऱ्यांनी रब्बी पिकांचे लागवड क्षेत्र वाढविले होते. गव्हाचा विक्रमी पेरा झालेला आहे. मात्र, ऐन काढणीच्या हंगामात लहरी पावसाचा धोका वाढल्याने शेतकऱ्यांची लगबग सुरू झाली आहे. पावसामुळे हवामान बदल झाला असल्याने शेतकऱ्यांनी गहू मळणीकडे विशेष लक्ष देण्यास सुरुवात केली आहे. त्यामुळे वेटींग लिस्ट तयार झाली आहे. 

तालुक्यात मोठ्या प्रमाणावर मध्यप्रदेश, हरियाणा आणि पंजाब राज्यातून हार्वेस्टर मशीन दाखल झाले आहेत. गहू कापणीसाठी मजुरांकडून मजुरीचे वाढीव दर मागितले जात आहेत. शिवाय दर देऊनही काम वेगाने होण्याची चिन्हे नसल्याने शेतकऱ्यांनी हार्वेस्टरद्वारे मळणी करण्यास प्राधान्य दिले आहे. एकाच वेळी गहू काढणीसाठी शेतकरी सरसावले असल्याने हार्वेस्टर चालकांकडे वेटींग लिस्ट तयार झाली आहे. 

शेतकऱ्यांना गहू सोंगणी, मळणीसाठी मोठा खर्च येतो. परंतु हार्वेस्टरने मळणी केल्यास एकरी १७०० ते १८०० रुपयांत काम होते. कमी वेळेत हमखास पीक हातात पडते. त्याही कारणाने यंत्राला पसंती वाढली आहे.

गहू सोंगणीस एक मजूर दोनशे रुपये दररोज प्रमाणे सांगावा लागतो. यामुळे एकरी दोन हजार खर्च होतो. तसेच मळणीसाठी वेगळा खर्च येतो. त्यामुळे हार्वेस्टरने मळणी केल्याने १५०० रुपयांत व कमी वेळेत काम होते.  - नारायण चोपडे, शेतकरी, भर जहांगीर, जि. वाशीम 

हार्वेस्टरच्या साह्याने गहू काढण्यासाठी एकरी दीड हजारांचा खर्च लागतो. महाराष्ट्रात यंदा मोठ्या प्रमाणावर गव्हाची लागवड झालेली आहे. सध्या एकाच वेळी पीक काढणीसाठी गर्दी होत आहे.  - धर्मासिंग, हार्वेस्टर मालक