मुंबई : कीटकनाशकांच्या विषबाधेमुळे अनेकांचा मृत्यू झाल्यानंतर भविष्यात अशी दुर्घटना होऊ नये यासाठी यवतमाळ जिल्ह्यात कीटकनाशक फवारणी करणाऱ्या शेतमजुरांसाठी नि:शुल्क आरोग्य तपासणी शिबिराचे आयोजन १८ ऑक्टोबरपासून करण्यात आले आहे. कृषी व आरोग्य विभागाच्या संयुक्त विद्यमाने ही मोहीम राबविण्यात येणार आहे. यवतमाळ दुर्घटनेनंतर अशा प्रकारची परिस्थिती पुन्हा उद्भवू नये यासाठी कृषी विभागामार्फत वेगवेगळ्या उपाययोजना केल्या जात आहेत. या उपाययोजनांचाच एक भाग म्हणून कीटकनाशक फवारणी करणाऱ्या शेतमजुरांसाठी आरोग्य तपासणी शिबिराचे आयोजन करण्यात आले आहे. सार्वजनिक आरोग्य विभागामार्फत जिल्ह्यातील ग्रामीण रुग्णालयात हे विशेष अभियान राबविण्यात येईल. कीटकनाशक फवारणी करणाऱ्या सर्व शेतमजुरांनी आरोग्य तपासणी संदर्भात जवळच्या ग्रामीण रुग्णालयात संपर्क साधून आरोग्य तपासणी करून घ्यावी. सदर अभियानांतर्गत आरोग्य तपासणी करून घेणाऱ्या शेतमजुराला आरोग्य तपासणी प्रमाणपत्र देण्यात येणार आहे. त्याच वेळी कृषी विभागामार्फत कीटकनाशकांच्या फवारणी वेळी वापरावयाच्या सुरक्षितता किटचे मोफत वाटप करण्यात येईल. प्रमाणपत्र पाहून काम द्यावे पुढील फवारणीसाठी शेतमजुरांना काम देताना त्यांच्याकडे आरोग्य विभागाचे फिटनेस प्रमाणपत्र आणि सुरक्षितता किट असल्याची खात्री शेतकरी बांधवांनी करावी त्यानंतर त्यांना फवारणीचे काम द्यावे, असे कृषी विभागामार्फत कळविण्यात आले आहे. कीटकनाशक फवारणीचे काम करणाऱ्या शेतमजुरांनी आरोग्य तपासणी करून घ्यावी, असे आवाहन कृषिमंत्री पांडुरंग फुंडकर आणि आरोग्य मंत्री डॉ. दीपक सावंत केले आहे.