पुणे : भारतीय कृषी संशोधन परिषदेच्या राष्ट्रीय द्राक्ष संशोधन केंद्राने बुधवार (ता. १२) द्राक्ष दिवसाचे आयोजन केले होते. या निमित्ताने केंद्राने विकसित केलेल्या मांजरी नवीन, मांजरी श्यामा, मांजरी मेडिका आणि मांजरी किशमिश या नव्या जातींचा परिचय शेतकऱ्यांना व्हावा, यासाठी शिवार फेरीचे आयोजन करण्यात आले. या वेळी शेतकऱ्यांना काढणीच्या नजीक असलेल्या द्राक्षवेली पाहता आल्या. 

शेतकऱ्यांचे स्वागत डॉ. ध. न. गावंडे यांनी केले. द्राक्ष संशोधन केंद्राचे संचालक डॉ. आर. जी. सोमकुंवर यांनी या वाणासंबंधी शेतकऱ्यांचे शंका, समाधान आणि मार्गदर्शन केले. उत्पादक महाराष्ट्र राज्य द्राक्ष उत्पादक बागायतदार संघाचे आजी, माजी पदाधिकारी सुभाष आर्वे, अरविंद कांचन, सांगली अध्यक्ष चंद्रकांत लांगडे, वासुदेव काठे, कैलास भोसले, अभिनव टिकेकर आदी उपस्थित होते. डॉ. अ. कु. शर्मा यांनी आभार मानले. 

प्रदर्शित नव्या जाती आणि त्यांची वैशिष्ट्ये

मांजरी नवीन

सेटेंनियल सिडलेसपासून क्लोनल सिलेक्शनद्वारे विकसित वाणाची द्राक्षे हिरवी, मोठ्या आकाराची, एक सारखी, सुगंधित आणि बिनबियांची असतात. परिपक्वतेचा कालावधी कमी (१०५ ते ११० दिवस) असून, संजीवकाची आवश्यकता कमी आहे. उत्पादन प्रति वेल १२ ते १४ किलो आहे.

मांजरी मेडिका 

जात पुसा नवरंग आणि फिल्म सिडलेस यांच्या संकरातून विकसित केली आहे. काळ्या रंगाची ही जात रस उत्पादनासाठी उपयुक्त आहे. आरोग्यासाठी लाभदायक आहे. परिपक्वतेचा कालावधी १२० ते १३० दिवसांचा आहे. प्रति वेल उत्पादन १६ ते १७ किलो इतके आहे.

मांजरी किशमिश 

ऊत्परिवर्तित किशमिश रोजावीसमधून विकसित केलेली ही जात खाणे व बेदाण्यासाठी उपयुक्त आहे. साखरेचे प्रमाण जास्त २३ ते २४ अंश ब्रिक्‍स असल्याने बेदाना रिकव्हरी अधिक प्रमाणात होते. हिरव्या रंगांच्या द्राक्ष वेलींची उत्पादन क्षमता प्रति वेल १५ ते २० किलो आहे.

मांजरी श्यामा 

ब्लॅक चंपा आणि थॉमसन सिडलेस या जातींच्या संकरातून विकसित वाणाची द्राक्षे काळ्या रंगाची आणि बियाणे रहित आहेत. या वेलीची उत्पादन क्षमता प्रति वेल १७ ते २० किलो इतकी आहे. हा वाण फळ छाटणीनंतर १३० ते १३५ दिवसांत परिपक्वता गाठतो.