आर्णी, जि. यवतमाळ : संततार पाऊस, वादळाचा रुद्रापूर, कोपरा, परसोडा शिवारातील ऊस पीकाला फटका बसत लाखो रुपयांची हानी झाली आहे. या नुकसानीचे सर्व्हेक्षण करुन भरपाई मिळावी, अशी मागणी या भागातील शेतकऱ्यांनी केली आहे.  जिल्ह्यातील काही भागात सिंचनाच्या सुविधा असून, त्या भरवशावर शेतकऱ्यांद्वारे व्यवसायीक व नगदी पिके घेतली जातात. आर्णी तालुक्‍यातील शेतकरी उसाची देखील लागवड करतात. मात्र गेल्या काही दिवसांपासून परिसरात पावसाची संततधार सुरु आहे. त्यासोबतच सोसाट्याचा वारा देखील सुटत असल्याने अनेक शेतकऱ्यांचा ऊस आडवा झाला आहे. रुद्रापूर शिवारातील आरुष मारबते यांनी दहा एकरावर उसाची लागवड केली आहे. वादळामुळे त्यातील सहा एकरावरील उसाचे नुकसान झाले. पाच ते सहा लाख रुपयांची हानी यामुळे झाल्याचे त्यांनी सांगितले. परसोडा शिवारातही ऊस उत्पादकांना वादळाचा फटका बसला. छाया अरुण कदम यांचा पाच एकरावर ऊस आहे. यातील अडीच एकर क्षेत्रातील पिकाचे नुकसान झाले. अडीच लाख रुपयांचे नुकसान झाल्याची माहिती त्यांनी दिली. कोपरा शिवारात तुळशीराम भायमारे यांच्या शिवारालगत असलेल्या नाल्याला पूर आल्याने त्यांचे सुमारे एक लाख रुपयांचे नुकसान झाले आहे. त्यांच्या पाचपैकी दीड एकरातील ऊसाला फटका बसला. या नुकसानीची प्रशासनाकडून कोणत्याच प्रकारची दखल घेण्यात आली नाही. परिणामी ऊस उत्पादक शेतकऱ्यांची चिंता वाढली आहे. 

प्रतिक्रिया 

माझ्या शेतालगत असलेल्या नाल्याला पूर आल्यामुळे कपाशी, सोयाबीन व उसाचे नुकसान झाले. प्रशासनाकडून अद्याप सर्व्हेक्षण व पंचनामा करण्यात आला नाही. त्या संदर्भाने आदेश व्हावे, अशी मागणी जिल्हाधिकारी अमोल येडगे यांना निवेदनाद्वारे केली आहे. प्रशासनाकडून ही बाब किती गांभीर्याने घेतली जाते, याकडे लक्ष लागले आहे.  तुळशीराम भायमारे, शेतकरी, कोपरा, ता. आर्णी.