सोलापूर : सिद्धेश्‍वर साखर कारखान्याची चिमणी हटविण्याचे काम सुरू झाल्यापासून १५ दिवसांत पूर्ण करू, अशी भूमिका ठेकेदाराने घेतली होती. परंतु, चिमणी हटविण्याचे काम तीन दिवसांमध्येच पूर्ण करावे लागेल, अशी सूचना जिल्हाधिकारी डॉ. राजेंद्र भोसले यांनी ठेकेदाराला केली आहे. चिमणी हटविण्यासाठी आवश्‍यक असलेली सर्व यंत्रणा सज्ज ठेवण्याची सूचनाही डॉ. भोसले यांनी ठेकेदाराला केली. 

चिमणी हटविण्यासाठी आवश्‍यक असलेले कामगार हे उत्तर प्रदेशातील असून, त्यांचे २२ कामगारांचे पथक असणार आहे. सोलापूरच्या गड्डा यात्रेसाठी आपल्याकडे अद्यापपर्यंत मैदानाची मागणी झालेली नाही. मागणी झाल्यानंतर योग्य वेळी योग्य निर्णय घेतला जाईल, असेही डॉ. भोसले यांनी सांगितले. 

जिल्ह्यातील पूरग्रस्तांच्या मदतीसाठी अनुदान मागणीचा प्रस्ताव राज्य सरकारला सादर करण्यात आला आहे. महसूल वसुलीचे दिलेले उद्दिष्ट डिसेंबरमध्येच पूर्ण करण्याची सूचनाही डॉ. भोसले यांनी महसूल प्रशासनातील अधिकारी व कर्मचाऱ्यांना केली. 

पालखी मार्गाचे भूसंपादन अंतिम टप्प्यात असून, तीर्थक्षेत्र विकास आराखड्यातील कामांसाठी आवश्‍यक असलेली भूसंपादन प्रक्रिया तातडीने करण्याचीही सूचना डॉ. भोसले यांनी केली आहे. केंद्र व राज्य सरकारच्या वतीने राबविण्यात येणाऱ्या विविध योजनांचा आढावा घेण्यात आला असल्याचेही डॉ. भोसले यांनी सांगितले. 

जिल्ह्यातील माळढोक अभयारण्याचे क्षेत्र कमी करण्यात आले असून, इको सेन्सिटिव्ह झोन तयार करण्यात आले आहेत. याबाबतची केंद्र सरकारची सुधारित अधिसूचना अद्यापही प्रसिद्ध न झाल्याने गौण खनिजासाठी मान्यता देता येत नाही. अनधिकृत गौणखनिज उपसा करणाऱ्यांवर पाचपट दंड आकारण्याची तरतूद असून, यानुसार कार्यवाही केली जात असल्याचे डॉ. भोसले यांनी सांगितले.