नागपूर‍ : विदर्भातील देशी गाईंच्या संवर्धनासोबत जास्त दूध देणाऱ्या गाईचे वाण विकसित करण्यासाठी आयव्हीएफ या भ्रूण प्रत्यारोपण तंत्राचा अभ्यास करण्यासाठी विदर्भ वैधानिक विकास मंडळ आणि महाराष्ट्र पशू व मत्स्य विज्ञान विद्यापीठ यांच्यामध्ये सामंजस्य करार करण्यात आला असल्याची माहिती विभागीय आयुक्त अनुप कुमार यांनी आज दिली.

विदर्भात देशी गाईचे वाण विकसित करताना नवीन तंत्रज्ञानाच्या माध्यमातून जास्त दूध देणाऱ्या चांगल्या गाईंची संख्या वाढविण्याच्या दृष्टीने उत्तम देशी गाईचे कृत्रिम रेतन वापरून गर्भधारणा करण्यासंदर्भात महाराष्ट्र पशू व मत्स्य विज्ञान विद्यापीठाचे सहयोगी डॉ. एस. के. सहातपुरे हे संशोधन करणार आहेत.

या संदर्भात वैधानिक विकास मंडळ, पशुसंवर्धन विभाग तसेच विद्यापीठाच्या संयुक्त उपक्रमाअंतर्गत आयव्हीएफ या तंत्राचा वापर करून नवीन जास्त दूध देणाऱ्या तसेच दुधामध्ये जास्त स्निग्धांश (फॅट) असणाऱ्या देशी गाईचे वाण विकसित करण्यात येणार आहे.

या नव्या संशोधनामुळे देशी चांगल्या गाईची जात विकसित करण्याला प्रोत्साहन मिळणार असल्याची माहिती विभागीय आयुक्त अनुप कुमार यांनी दिली. विदर्भ वैधानिक विकास मंडळाच्या पुढाकारामुळे देशी गाईंच्या विकासासोबत अधिक फॅट असलेले दूध या नव्या संशोधनामुळे निर्माण होणार असल्यामुळे विदर्भातील दूध उत्पादनवाढीला प्रोत्साहन मिळणार आहे. या नवीन तंत्रज्ञानाच्या अभ्यासासोबतच त्याचा प्रत्यक्ष वापर होण्यासंदर्भात डॉ. सचिन बेलसरे हे सल्लागार म्हणून या प्रकल्पाचे काम बघणार आहेत.

देशी गाईंचे वान विकसित करण्यासाठी वापरण्यात येणारे नवीन तंत्रज्ञान वर्धा, नागपूर व चंद्रपूर जिल्ह्यासाठी राहणार असून नवीन संशोधन विकासासाठी विदर्भ विकास मंडळाचे तज्ज्ञ सदस्य डॉ. कपिल चंद्रायण, डॉ. किशोर मोघे, डॉ. बंग, डॉ. रवींद्र कोल्हे आदींनी पुढाकार घेतला आहे.