यवतमाळ ः दारव्हा तालुक्‍यातील शेतकऱ्यांनी आपल्या शेतीमालाची विक्री बाजार समितीच्या माध्यमातूनच करावी, असे आवाहन सहायक निबंधक बी. जी. जाधव यांनी केले आहे.  बाजार समितीत शेतीमाल विक्रीकरिता आणला जात नाही. त्यामुळे जाहीर लिलाव प्रक्रिया बंद पडली आहे. बहुतांश शेतकरी खेडा खरेदी किंवा बाजार समित्यांबाहेरच व्यापाऱ्यांना आपला शेतीमाल विकतात. या व्यवहाराची कोणतीच पावती दिली जात नाही. परिणामी, अशा व्यवहारांमध्ये शेतकऱ्यांची फसवणूक होण्याची शक्‍यता अधिक राहते. पावती नसल्याने अशा प्रकरणात तक्रार ही करता येत नाही. परिणामी पुढे कायदेशीर अडचणी निर्माण होतात व शेतकऱ्यांचे आर्थिक नुकसान होण्याची शक्‍यता अधिक राहते. बाजार समिती सेसचे सुद्धा यामुळे नुकसान होते. त्यामुळे शेतकऱ्यांनी लिलावाद्वारे शेतीमाल विक्री करावी व फसगत टाळून बाजार समितीला सहकार्य करावे, असे आवाहन करण्यात आले आहे.  दारव्हा तालुक्‍यात खासगी व्यापाऱ्यांकडून शेतीमालाची खरेदी जोरात सुरू आहे. परिणामी, शेतकरी बाजार समितीकडे फिरकत नसल्याने बाजार समिती ओस पडली आहे. कोणताही व्यवहार होत नसल्याने बाजार समिती प्रशासनाची चिंता वाढली आहे. त्याची दखल घेत अनधिकृत व्यवहाराविरोधात धडक कारवाईचा निर्णय बाजार समिती प्रशासनाकडून घेण्यात आला आहे. व्यापाऱ्यांचे परवाने निलंबित करणे, दुकानातील साहित्याची जप्ती तसेच वेळ पडल्यास फौजदारी कारवाईदेखील करण्यात येणार असल्याची माहिती सूत्रांनी दिली. 

नोंदणीकृत अडत्या नसल्याचा परिणाम  बाजार समिती प्रशासनाने मात्र खेडा खरेदीच नाही, तर अन्य कारणामुळे बाजार समितीत आवक होत असल्याचे सांगितले. त्यामध्ये बाजार समितीअंतर्गत एकही नोंदणीकृत अडत्या नाही. त्यासोबतच नजीकच्या वाशीम जिल्ह्यातील कारंजा बाजार समितीमध्ये शेतकरी आपला शेतीमाल विक्रीसाठी नेतात. इतरही काही बाजार समित्या दारव्हापासून कमी अंतरावर आहे, त्याचा परिणामदेखील आवकेवर होतो, असे बाजार समितीकडून सांगण्यात आले.