वर्धा : टेक्स्टाईल उद्योजकांकडून केंद्र सरकारकडे कापूस दरवाढ प्रकरणी हस्तक्षेपाची मागणी करण्यात आली आहे. त्या पार्श्वभूमीवर कापसाचे दर १५० ते २०० रुपयांनी कमी झाले आहेत. गुरुवारी (ता.६) वर्धा बाजार समितीत ९५०० ते ९८५० रुपयांनी कापसाचे व्यवहार झाले. 

हिंगणघाट बाजार समितीत दहा १०४०० रुपयांनी बुधवारी (ता.५) कापसाचे व्यवहार झाले होते. सिंदी रेल्वे बाजार समितीत ९९०० रुपयाने कापसाचे व्यवहार झाले. सध्यास्थितत सिंदी बाजार समितीत ९७०० रुपयांवर कापसाचे दर स्थिर आहेत. बुधवारीच (ता.५)  वर्धा बाजार समितीत कापूस दराने दहा हजार रुपयांवर झेप घेतली होती. आजवर वर्धा बाजार समितीत ७३ हजार १०० क्विंटल कापसाची खरेदी झाली आहे. बुधवारी कापसाची ८०० क्विंटलची आवक झाली. गुरुवारी (ता.६) कापूस दरात १५० ते २०० रुपयांची घट नोंदविण्यात आली. 

टेक्सस्टाईल उद्योजकांकडून दर नियंत्रणासाठी दबावाच्या पार्श्वभूमीवर दरात घसरण झाल्याचे सांगण्यात आले. ९५०० ते ९८५० रुपये असे कापसाचे दर होते. बाजार समितीत तुरीची देखील नियमित आवक होत असल्याचे सांगण्यात आले. गुरुवारी १५ क्विंटल आवक होऊन ५१७५ ते ५७६५ रुपयांचा दर मिळाला. गव्हाचे व्यवहार १८०० ते १८३५ रुपयांनी झाले. गहू आवक १२ क्विंटल होती. सोयाबीनची १८२ क्विंटल आवक झाली. ५८०० ते ६२०० रुपये प्रतिक्विंटल असा सोयाबीनचा दर होता. गेल्या आठवड्यापासून सोयाबीनच्या दरात तेजी आल्याची माहिती व्यापारी सूत्रांनी दिली.