नगर ः नगर जिल्ह्यामधील अकोला तालुक्याच्या पश्चिम भागात रतनवाडी, घाटघर, पांजरे, वाकी भागात गेल्या काही दिवसांपासून सातत्याने पाऊस टिकून आहे. मंगळवारी सकाळी सहा वाजेपर्यंत २४ तासांत रतनवाडी येथे १०७, घाटघरला १११, पांजरेला ११८ मिलिमीटर पावसाची नोंद झाली. पश्चिम भागातील पावसामुळे भंडारदरा, मुळा धरणांत पाण्याची आवक होत आहे. 

आतापर्यंत भंडादरदा धरणात तीन टीएमसीच्या जवळपास पाणीसाठा झाला आहे. मुळा धरणानेही साडेपाच टीएमसीचा टप्पा ओलांडला आहे. नगर जिल्ह्याच्या अन्य भागांत मात्र पाऊस नाही. 

नगर जिल्ह्यामध्ये अकोला तालुक्याच्या पश्चिम भागातील कळुसबाई शिखर, हरिचंद्रगड परिसरात सर्वाधिक पाऊस पडतो. यंदा मात्र पावसाळा सुरू झाला तरी, पंधरा दिवस उशिराने पावसाचे आगमन झाले. पावसाला उशीर होत असल्याने तालुक्यातील भात उत्पादक शेतकरी चिंतेत होते. चार दिवसांपासून भंडारदरा व मुळा धरणांच्या पाणलोटात मात्र जोरदार पाऊस पडत आहे. 

संततधार व जोरदार पावसामुळे या भागातील जनजीवन विस्कळित झाले आहे. मात्र, चांगल्या पावसाने शेतकऱ्यांत आनंद व्यक्त केला जात आहे.

नगर जिल्ह्याच्या अन्य भागात मात्र पुरेसा पाऊस नाही. त्यामुळे खरिपाच्या पेरण्या रखडल्या आहेत. पावसाळ्याचा महिना उलटून गेला मात्र अजूनही पाणीटंचाई आणि चाऱ्याचा प्रश्न कायम आहे.

मंगळवारी सकाळी सहा वाजेपर्यंत झालेला पाऊस ः घाटघर ः १११, रतनवाडी १०७, पांजरे ः ११८, वाकी ः १०२, भंडारदरा ः १०५, आढळा ः १३, निळवंडे ः १८, अकोले ः १२, कोतुळ ः ७.