मुंबई: काँग्रेसने दोन जागांचा आग्रह कायम ठेवल्याने महाराष्ट्र विकास आघाडीत विधानपरिषदेच्या जागावाटपाचा पेच गुरुवारी (ता.७) कायम होता. त्यामुळे काँग्रेस आणि राष्ट्रवादीकडून उमेदवारांची घोषणा लांबणीवर पडली आहे. विरोधी पक्ष भाजपनेही आपले उमेदवार गुलदस्त्यात ठेवले आहेत. 

विधानपरिषदेच्या नऊ जागांसाठी येत्या २१ मे रोजी निवडणूक होऊ घातली आहे. राज्यात कोरोनाचे संकट असल्याने निवडणूक बिनविरोध करावी असा मतप्रवाह आहे. खुद्द मुख्यमंत्री उद्धव ठाकरे हे या निवडणुकीतील उमेदवार असल्याने मतदान टळावे, असा शिवसेनेचा प्रयत्न आहे. 

विधानसभेतील पक्षनिहाय संख्याबळानुसार भाजपचे तीन, शिवसेना आणि राष्ट्रवादीचे दोन तर काँग्रेसचा एक उमेदवार निवडून येऊ शकतो. त्यामुळे नवव्या जागेसाठी सत्ताधारी आणि विरोधी पक्षात चुरस आहे. भाजपला चौथा उमेदवार निवडून आणण्यासाठी आघाडीपेक्षा कमी मतांची गरज आहे. मतदान गुप्त असल्याने भाजप चौथी जागा लढविण्यावर ठाम आहे. चार जागा सोडल्या तर निवडणूक बिनविरोध होऊ शकते, असे भाजप नेत्यांचे मत आहे. 

राज्यसभा निवडणुकीत राष्ट्रवादीला दोन जागा सुटल्या होत्या. त्यामुळे या निवडणुकीत दोन जागा मिळाव्यात असा युक्तिवाद काँग्रेसकडून केला जात आहे. यासंदर्भात आघाडीच्या नेत्यांच्या बैठका होऊनही तोडगा निघालेला नाही. राष्ट्रवादीचे सर्वेसर्वा शरद पवार हे दिल्लीतील काँग्रेस नेत्यांशी बोलून मार्ग काढणार आहेत. त्यामुळे शनिवार, रविवारपर्यंत तोडगा निघण्याची शक्यता आहे. 

दरम्यान, विधानपरिषद निवडणुकीचा अर्ज दाखल करण्यासाठी शनिवारचा (ता.९) एकच दिवस शिल्लक आहे.  इच्छुक उमेदवार  राष्ट्रवादी काँग्रेस : शशिकांत शिंदे, सुरेखा ठाकरे, रुपाली चाकणकर, शिवाजीराव गर्जे, अदिती नलावडे, महेश तपासे, परवेज कोकणी 

काँग्रेस : नसीम खान, अनिस अहमद, माणिकराव ठाकरे, मुजफ्फर हुसेन, चारूलता टोकस, सचिन सावंत, गणेश पाटील, राजेश शर्मा