नाशिक : द्राक्षापासून बेदाणा निर्मितीसाठी लागणाऱ्या रसायनांचा गेल्या काही दिवसांपासून मोठ्या प्रमाणावर तुटवडा निर्माण झाला आहे. त्यामुळे ज्या शेतकऱ्यांना बेदाणा निर्मिती करायची त्यांना उपलब्ध करून देण्यासाठी द्राक्ष बागायतदार संघ व सह्याद्री फार्म प्रयत्नशील होते. अखेर डिपिंग ऑईल व पोटॅशिअम बायकार्बोनेट उपलब्धता झाली असून द्राक्ष उत्पादकांकरिता विक्रीसाठी उपलब्ध असल्याची माहिती द्राक्ष बागायतदार संघाचे नाशिक विभागीय अध्यक्ष रवींद्र बोराडे यांनी दिली. 

सह्याद्री फार्मर्स प्रोड्युसर कंपनीच्या मोहाडी (ता. दिंडोरी) येथे उपलब्ध करून देण्यात आलेले आहे. तरी ज्या शेतकऱ्यांना बेदाणा निर्मितीसाठी आवश्यकता आहे, अशा शेतकऱ्यांसाठी सह्याद्री फार्म येथून मंगळवारी (ता. ७) सकाळी १० ते सायंकाळी ५ वाजेपर्यंत खरेदीसाठी उपलब्ध राहील, असे द्राक्ष बागायतदार संघाचे नाशिक विभागीय अध्यक्ष रवींद्र बोराडे व सह्याद्री फार्मर्स प्रोड्युसर कंपनीचे अध्यक्ष व व्यवस्थापकीय संचालक विलास शिंदे यांनी कळविले आहे.

खरेदीच्या दरम्यान ‘कोरोना’च्या पार्श्वभूमीवर द्राक्ष उत्पादकांनी अनावश्यक अधिक गर्दी टाळावी. सोशल डिस्टन्सिंगचे काटेकोर पालन करावे. संचारबंदी व जमावबंदीच्या नियमांचे पालन करून शासकीय यंत्रणेला सहकार्य करावे, असे आवाहन श्री. बोराडे यांनी केले आहे.