गडचिरोली : ‘गाव करी ते राव काय करी’ या म्हणीचा आणि कल्पकतेचा प्रत्यय देत दुर्गम आणि नक्षलप्रवण गडचिरोली जिल्ह्यातील ग्रामस्थांनी श्रमदानातून बांबूचा पूल तयार केला. गुंडेनूर नाल्यावर तयार करण्यात आलेल्या १५० फूट लांब आणि ६ फूट रुंद या पुलामुळे गावाचा तालुका मुख्यालयाशी संपर्क होण्यास मदत झाली आहे.

गडचिरोली जिल्हा हा बारमाही नद्यांचा जिल्हा म्हणून ओळखला जातो. परिणामी पावसाळ्यात या भागातील नद्या, नाल्यांना पूर येत गावांचा संपर्क शहर मुख्यालयाशी तुटतो. नक्षल्यांकडून विरोध असल्याच्या परिणामी अनेक दुर्गम भागांत रस्ते, नद्यांवरील पुलांचे कामही होऊ शकले नाही.

विशेष म्हणजे राज्यपालांनी दत्तक घेतलेल्या भामरागड तालुक्‍याचे चित्रही यापेक्षा वेगळे नाही. या आदिवासी बहुल तालुक्‍यात चांगले रस्ते नाहीत, एवढेच नाही तर नद्यांवर पूलदेखील नाहीत. त्यामुळे नदीपलीकडे राहणाऱ्या गावकऱ्यांना होडी, डोग्यांच्या आधारे नदी पार करावी लागते.

या अवस्थेत वर्षानुवर्षे जीवन जगणाऱ्या ग्रामस्थांच्या समस्या प्रशासनाने सोडविल्या नाहीत. अखेर इच्छाशक्‍तीच्या बळावर ग्रामस्थांनीच या समस्यांवर मात करण्यासाठी पुढाकार घेतला. लाहेरीपासून ५ किलोमीटर अंतरावरील गुंडेनूर गावाजवळून गुंडेनूर नाला वाहतो. या नाल्याचे पात्र खोल व मोठे असल्याने पावसाळाभर व नंतरही तो वाहत असतो.

यामुळे भामगराड, लाहेरी, बिनागुंडा, कुवाकोडी, तुरमर्का, फादेवाडा, पेरमिलभट्टी आदी गावांचा संपर्क तुटतो. बाजारहाट करण्यापासून तर गावातील मुलांचे शिक्षण यामुळे प्रभावित होते. शासकीय कामेदेखील वेळेवर होत नाहीत.

कल्पकतेतून तयार केला पूल

ग्रामस्थांनी शासनावर अवलंबून न राहता कल्पकतेतून पूल उभारण्याचा निर्णय घेतला. १५० फूट लांब आणि सहा फूट रुंदीचा पूल तयार केला. बांबू, लाकूड आणि दगड या स्थानिक स्तरावर उपलब्ध होणाऱ्या संसाधनाचा वापर याकामी केला गेला असून, अभियांत्रिकीचा उत्कृष्ट नमुना या माध्यमातून साकारला गेला आहे.