जळगाव  ः हवामानावर आधारित फळ पीकविमा योजनेत सहभागी कमाल केळी उत्पादक अतिथंडी, अतिउष्णता व वादळासंबंधीच्या नुकसानभरपाईसाठी पात्र ठरले आहेत. या शेतकऱ्यांना विमा परताव्यांचे वितरण सुरू करण्याचा मुद्दा उपस्थित केला जात आहे. 

जिल्ह्यात सुमारे २२ हजार केळी उत्पादक या विमा योजनेत सहभागी झाले होते. नोव्हेंबर २०१८ ते जुलै २०१९ या नऊ महिन्यांच्या कालावधीसंबंधी संबंधित विमाधारकांच्या केळी पिकाला विमा संरक्षण मिळाले आहे. जिल्ह्यात डिसेंबरपासून प्रतिकूल हवामानामुळे केळीचे नुकसान होत आहे. डिसेंबर व जानेवारी महिन्यात अनेक दिवस किमान तापमान पाच अंश सेल्सिअसपेक्षा कमी होते. एप्रिल, मे व जून महिन्यात कमाल तापमान प्रत्येकी ४७, ४८ व ४५ अंश सेल्सिअसपर्यंत राहिले आहे. चोपडा, यावल, रावेर, जळगाव, पाचोरा, भडगाव, जामनेर, मुक्ताईनगर या केळी उत्पादक तालुक्‍यांमध्ये वादळामुळेही केळी जमीनदोस्त झाली आहे. वादळासंबंधी पंचनाम्यांची कार्यवाही अनेक ठिकाणी विमा कंपनीने शासकीय यंत्रणांच्या मदतीने पूर्ण केली. त्याचे अहवाल विमा कंपनीकडे पोचले असून, वादळात ६० ते ७० टक्के नुकसान अनेक भागात झाले आहे. 

अतिथंडी, अतिउष्णता व वादळात नुकसानीसंबंधी कमाल केळी विमाधारक परतावे मिळण्यास पात्र ठरले आहेत. विमा कालावधी जुलैअखेर पूर्ण होईल. मागील वर्षी विमा कालावधी संपल्यानंतर चार महिन्यांनी विमा परतावे संबंधित विमा कंपनीने दिले होते. तेदेखील अपूर्ण स्वरूपात दिले होते. परंतु या हंगामात हे परतावे ऑगस्टपासूनच वितरित करावेत. कारण, पावसाळ्यात अतिवृष्टी व गारपिटीसंबंधीची नुकसानभरपाई विमा योजनेतून मिळत नाही. यामुळे पुढे फारसे नुकसान होणार नाही, हे गृहीत धरून देय परतावे देण्याची तयारी काही नियम बाजूला करून सुरू करावी. कारण केळी उत्पादक नुकसानीमुळे व कमी दरांच्या प्रश्‍नाने आर्थिक संकटात सापडले आहेत, असे केळी उत्पादकांनी म्हटले आहे.