जळगाव ः खानदेशात सुमारे ११ ते १२ दिवसांचा पावसाचा खंड पडल्याने कोरडवाहू कापूस, मका पिकाला फटका बसला. त्यात कापूस पिकात पाने खाणाऱ्या किडींचा हल्ला झाल्याने अनेक शेतकऱ्यांचे नुकसान झाले. यामुळे पीक मोडण्याची वेळ आली. पीक मोडलेल्या भागात व पेरणीस उशीर झालेल्या शेतकऱ्यांनी बाजरी पेरणीवर भर दिला आहे.

बाजरीचे क्षेत्र खानदेशात यंदा चार ते पाच हजार हेक्‍टरने वाढण्याचा अंदाज आहे. कमी कालावधी व उशिरा पेरणीसाठी बाजरी पीक उपयुक्त मानले जाते. पावसाचा खंड पडल्याने अनेक शेतकऱ्यांची पेरणी रखडली होती. ही पेरणी मागील आठवड्यात झालेल्या पावसानंतर सुरू झाली. सुमारे ५५ टक्के क्षेत्रात पेरणी रखडली होती. ही पेरणी शनिवारी (ता. २७), रविवारी (ता. २८) सुरू झाली. यात अनेक शेतकरी बाजरी पेरणीस पसंती देत आहेत. बाजरी पिकाचे उत्पादन मागील हंगामात अतिपावसाने वाया गेले होते; परंतु गेल्या रब्बी हंगामात बाजरीचे एकरी १२ ते १३ क्विंटल उत्पादन आले.

चांगले वाणही बाजारात उपलब्ध असल्याने अनेक शेतकऱ्यांनी बाजरी पेरणीवर भर दिला. धुळ्यातील शिंदखेडा, शिरपूर, धुळे, साक्री, नंदुरबारमधील शहादा, नंदुरबार, नवापूर, जळगावमधील भडगाव, चाळीसगाव, धरणगाव, चोपडा या भागात बाजरीचे क्षेत्र अधिक आहे. खानदेशात मिळून सुमारे १६ ते १८ हजार हेक्‍टरवर बाजरीची पेरणी अपेक्षित आहे. बाजारात बाजरीचे दर स्थिर आहेत. सध्या १६५० रुपये प्रतिक्विंटलपेक्षा अधिक दर बाजारात मिळत आहे. दर स्थिर असल्याने व कमी कालावधीचे पीक म्हणून अनेक शेतकरी या पिकाकडे वळल्याची माहिती मिळाली.