पुणे : राज्यातील उसाची उत्पादकता वाढविण्यासाठी यापुढे संशोधनावर भर देण्याचा संकल्प वसंतदादा शुगर इन्स्टिट्यूटने (व्हीएसआय) केला आहे. त्यासाठी माजी केंद्रीय कृषिमंत्री शरद पवार यांच्या उपस्थितीत उद्या (ता. ९) ‘व्हीएसआय’ने कार्यशाळेचे आयोजन केले आहे.  साखर कारखान्यांसाठी स्वंतत्र ऊस विकास कार्यशाळेचे नियोजन करण्याचा निर्णय ‘व्हीएसआय’ने घेतला होता. त्यानुसार उद्या सकाळी दहा वाजता व्हीएसआयच्या मांजरी बुद्रुक (ता. हवेली) येथील मुख्यालयात कार्यशाळेला सुरवात होईल. 

राज्यातील सर्व साखर कारखान्यांचे अध्यक्ष, उपाध्यक्ष, कार्यकारी संचालक, कृषी विकास अधिकारी आणि ऊस पुरवठा अधिकाऱ्यांशी यावेळी श्री. पवार संवाद साधणार आहेत. ‘व्हीएसआय’ने शेतकऱ्यांसाठी ‘ऊस शेती ज्ञानयाग’देखील आयोजित केला होता. या उपक्रमातून राज्यातील शेतकऱ्यांना ऊस शेतीचे आधुनिक तंत्रज्ञान प्रात्यक्षिकासहीत दिले जाते. 

‘व्हीएसआय’चे महासंचालक शिवाजीराव देशमुख यांच्या म्हणण्यानुसार राज्याची ऊस उत्पादकता गेल्या दोन दशकांपासून स्थिर आहे. मात्र, साखर उद्योगात महाराष्ट्राशी स्पर्धा करणाऱ्या उत्तर भारतात ऊस आणि साखर उत्पादनात चांगली वाढ होताना दिसते आहे. त्यामुळे राज्यातील साखर कारखान्यांना उत्पादकता वाढीसाठी प्रयत्न करणे अत्यावश्यक आहे. 

उत्पादकता वाढीसाठी कारखान्यांना अर्थातच चांगल्या प्रतीचा ऊस पुरवठा शेतकऱ्यांकडून होण्यासाठी आधुनिक तंत्रज्ञानावर आधारित ऊस लागवडीकडे भर द्यावा लागणार आहे. सध्याच्या लागवड तंत्रज्ञानात बदल, चांगल्या जातींचा वापर होण्यासाठी ऊस विकास कार्यक्रम राबवावा लागेल, असेही ‘व्हीएसआय’चे म्हणणे आहे.