नगर ः सातवा वेतन आयोग व दहा, वीस व तीस वर्षांनंतरची आश्वासित प्रगती योजना लागू करावी या मागणीसाठी राज्यातील चारही कृषी विद्यापीठांतील अधिकारी, कर्मचाऱ्यांचे बेमुदत लेखणी बंद आंदोलन सुरू होते. मंगळवारी (ता.१०) कृषिमंत्री दादा भुसे यांच्या आश्वासनानंतर आंदोलन मागे घेण्यात आल्याचे जाहीर करण्यात आले आहे. मागण्या लवकर मार्गी लागाव्यात यासाठी दिवाळीनंतर बैठक होणार असल्याचे या वेळी सांगण्यात आले.

कृषी विद्यापीठातील कर्मचाऱ्यांना सातवा वेतन आयोग व दहा, वीस व तीस वर्षांनंतरची आश्वासित प्रगती योजना लागू करावी या मागणीसाठी पंधरा दिवसापासून कृषी विद्यापीठातील कर्मचाऱ्यांचे आंदोलन सुरू होते. त्यावर मंगळवारी (ता.१०) कृषिमंत्री दादा भुसे व कृषी सचीव एकनाथ डवले यांच्यासह खासदार विनायक राऊत, राजन विचारे, योगेश कदम, आमदार नितीन देशमुख, यांच्या उपस्थितीत महात्मा फुले कृषी विद्यापीठातील कर्मचारी समन्वय संघाचे अध्यक्ष डॉ. चिंतामणी देवकर, डॉ. बाळासाहेब सावंत कोकण कृषी विद्यापीठातील कर्मचारी समन्वय संघाचे अध्यक्ष डॉ. विठ्ठल नाईक, डॉ. पंजाबराव देशमुख कृषी विद्यापीठाच्या कर्मचारी समन्वय संघाचे अध्यक्ष डॉ. संजय कोकाटे, व वसंतराव नाईक मराठवाडा कृषी विद्यापाठीच्या कर्मचारी समन्वय संघाचे अध्यक्ष डॉ. दिलीप मोरे यांच्यासह काही प्रतिनिधी उपस्थित होते.  कृषी विद्यापीठातील कर्मचाऱ्यांच्या सर्व मागण्यांवर सविस्तर चर्चा करून मागण्या तातडीने मार्गी लावण्याचे भुसे यांनी आश्वासन दिले. त्यानंतर आंदोलन मागे घेत असल्याचे समन्वय संघाने जाहीर केले असे डॉ. चिंतामणी देवकर यांनी सांगितले. दिवाळीनंतर पुन्हा बैठक घेऊन मागण्या लवकर कशा सोडवता येतील याबाबत चर्चा होणार आहे. कर्मचाऱ्यांचे आंदोलन मागे घेतल्याने कृषी विद्यापीठातील कामकाज आजपासून (ता.११) सुरळीत होणार आहे.