सोयगाव, जि. औरंगाबाद ः तालुक्याच्या सीताफळाचा गोडवा सर्वदूर पसरत असताना राज्याचे कृषी सचिव एकनाथ डवले यांनी पळसखेड (ता.सोयगाव) येथील निसर्ग कवी ना. धो. महानोर यांच्या सीताफळ बागेला नुकतीच भेट देवून पाहणी केली. कृषी सचिवांच्या दौऱ्यात निसर्ग कवी ना.धो. महानोर यांनी सीताफळ लागवडीपासून ते उत्पन्नापर्यंत प्रवासाची माहिती दिली. यावेळी कृषी सचिव डवले यांनी कृषी विभागाच्या माध्यमातून झालेल्या विविध कामांची पाहणी करून सोयगाव तालुक्याचे अधिकाधिक क्षेत्र सिंचनाखाली येण्यासाठी शेतकऱ्यांना विविध योजनांचा लाभ देण्याची सूचना तालुका कृषी विभागाला केली. यामध्ये प्रामुख्याने जलयुक्त शिवार योजनांच्या झालेल्या कामांचा आढावा घेऊन पाहणी केली. शेततळे, नाले खोलीकरण आदी कामांची पाहणी केली.  यावेळी निसर्ग कवी ना.धो. महानोर यांनी कृषी सचिव एकनाथ डवले यांना सीताफळ भेट दिले. उपविभागीय कृषी अधिकारी प्रबोध चव्हाण, कृषिभूषण रवींद्र पाटील, दिलीप पाटील, तालुका कृषी अधिकारी संगीता पवार, मंडळ कृषी अधिकारी संपत वाघ, दीपक बिऱ्हारे, कविता अहिरराव आदींची उपस्थिती होती.