सोनई, ता. नेवासा  : सोनईसह अठरा गावांतील पिण्याच्या पाण्याची योजना सुरू व्हावी, यासाठी शनिवारी माजी आमदार शंकरराव गडाख यांच्या मार्गदर्शनाखाली राहुरी-शनिशिंगणापूर रस्त्यावर दोन तास रास्ता रोको आंदोलन करण्यात आले. या आंदोलनासाठी हजारो महिला हंडे घेऊन उपस्थित होत्या.

सोनई, तामसवाडीसह वाड्यावस्त्यांचा या योजनेत समावेश आहे. ८५ कोटी रुपये खर्चाची ही योजना एक सव्वा वर्षांपासून सुरू झाली. मात्र ही योजना सलग महिनाभर कधीच सुरू राहिली नाही. योजना हस्तांतर व कामगारांच्या वेतनावरून योजनेला साडेसातीचा फेरा लागला आहे. आठ दिवसापासून पाणी बंद झाल्याने शनिवारी सकाळी दहा वाजता राहुरी रस्त्यावरील बेल्हेकरवाडी फाटा येथे अठरा गावांतील ग्रामस्थ ठाण मांडून बसले. महिला हंडा, बादल्या, ड्रम घेऊन रस्त्यावर बसल्या.

या वेळी मुकुंद भोगे, जयवंत लिपाने, खलील इनामदार, संजय जंगले, डॉ.रामनाथ बडे, शरद आरगडे, शरद जाधव यांची भाषणे झाली. माजी आमदार गडाख यांनी या योजनेसाठी केलेले प्रयत्न सांगून आमदार मुरकुटे यांच्या निष्क्रियतेमुळेच ही योजना बंद पडली असा जाहीर आरोप केला. शनिवार असल्याने या आंदोलनामुळे शनिभक्तांची मोठ्या प्रमाणात अडचण झाली. पोलिस बंदोबस्त मोठ्या प्रमाणात होता.