अकोला : शेतकऱ्यांच्या शेती तसेच पीककर्जाविषयी असलेल्या समस्या सोडविण्यासाठी जिल्हा प्रशासनाच्या वतीने प्रत्येक गावात ‘एक दिवस शेतकऱ्यासोबत’ या उपक्रमाचे शनिवारी (ता.३०) अायोजन करण्यात येणार असल्याची माहिती जिल्हाधिकारी आस्तिक कुमार पाण्डेय यांनी दिली.

आपले सरकार, कृषी सेवा केंद्रांबाबतचे प्रश्न, कोणत्या वाणांची पेरणी करणार, कोणते बियाणे वापरणार, पिकांवर कोणत्या कीड -रोगांचा प्रादुर्भाव होऊ शकताे, यासाठी असेलल्या उपाययोजना, पिकांवर फवारणी करताना घ्यावयाची काळजी, याबाबतची माहिती तसेच परिवारातील सदस्य, लाभार्थी, कोणत्या योजनेचा लाभ मिळाला आहे, पीककर्ज मिळाले का, पीककर्ज घेतल्यास त्याची परतफेड कशी करणार, तसेच शेतकऱ्यांना असलेल्या अडचणी, समस्या याबाबतची माहिती एक दिवस शेतकऱ्यांसोबत या उपक्रमामध्ये घेण्यात येणार आहे.

यासाठी ग्रामसेवक, कृषी सहायक, कृषी सेवक, शिक्षक, अंगणवाडी सेविका तसेच जिल्हा परिषद, पाटबंधारे, सार्वजनिक बांधकाम, जिल्हा प्रशासनातील तहसीलदार, नायब तहसीलदार, बँक   कर्मचारी आदी प्रत्येक गावात जाऊन शेतकऱ्यांना भेटणार आहेत. या उपक्रमासाठी नोडल ऑफिसर म्हणून उपविभागीय अधिकारी संजय खडसे यांची नियुक्ती करण्यात आली आहे.