सोलापूर : बार्शी तालुक्यातील सहा स्वस्त धान्य दुकानांवर कारवाई करण्यात आली आहे, अशी माहिती जिल्हाधिकारी मिलिंद शंभरकर यांनी दिली. 

रायगड जिल्ह्यातील पनवेल येथे सापडलेल्या धान्य साठ्याच्या पार्श्वभूमीवर बार्शी तालुक्यातील दुकानांची तपासणी करावी, दोषी आढळणाऱ्या दुकानांवर कारवाई करण्याचे आदेश शंभरकर यांनी दिले होते. त्यानुसार जिल्हा पुरवठा अधिकारी उत्तम पाटील यांनी ही कारवाई केली.

बार्शी तालुक्यातील दोनशे रास्तभाव धान्य दुकानांची दहा मंडल अधिकारी आणि ७८ पथकाद्वारे तपासणी करण्यात आली. या तपासणीमध्ये दोषी आढळलेल्या सहा दुकांनावर कारवाई करण्यात आली. तपासणीत प्रत्यक्ष गावात जावून ४ हजार २०० लोकांचे जबाब घेण्यात आले. त्या जबाबात लोकांनी अंत्येादय अन्न योजना, प्राधान्य कुटुंब लाभार्थी या योजनेचे अन्न मिळाल्याची माहिती पाटील यांनी दिली.  या दुकानदारांचा समावेश 

संतोष गोडसे, उपळाई ठोंगे यांनी परवान्यात नमुद ठिकाणी व्यतिरिक्त अन्य ठिकाणी धान्याची साठवणूक केली. महिला दुध उत्पादक संस्था, उंबरगे, यांनी साठा रजिस्टर अद्ययावत ठेवले नाही व वजनकाटा पडताळणी करुन घेतली नाही. त्यामुळे त्यांच्या दुकानाची अनामत रक्कम जप्त करण्यासह पाच हजार रुपये दंड केला. 

नारायण गोरे, चिखर्डे, मोहन सपकाळ, झरेगाव आणि शोभाताई सोपल महिला बचत गट पानगाव यांनी पंतप्रधान गरीब कल्याण योजनेअंतर्गत मोफत तांदूळ वाटपात ढिलाई केली. त्यामुळे अनामत रक्कम जप्त करुन परवाना निलंबित करण्यात आला.