हिंगोली : जिल्ह्यात यंदाच्या खरिप हंगामातील पीक कर्जवाटपास सुरुवात झाली आहे. गुरुवार (ता.३०) पर्यंत ७३ शेतकऱ्यांना ५६ लाख ९१ हजार रुपयांचे वाटप करण्यात आले, अशी माहिती संबंधीत सूत्रांनी दिली. 

जिल्ह्यातील बॅंकाना यंदा १ हजार ४४३ कोटी ७३ लाख रुपये पीक कर्जवाटपाचे उद्दिष्ट देण्यात आले आहे. त्यात खरिप हंगामामध्ये १ हजार १६८ कोटी ९५ लाख रुपये आणि रब्बी हंगामातील २७४ कोटी ७८ लाख रुपयांच्या उद्दिष्टाचा समावेश आहे. यंदा जिल्हा बॅंकेला एकूण १८५ कोटी ९३ लाख रुपये कर्जवाटपाचे उद्दिष्ट आहे. त्यात खरिपातील १४८ कोटी ८९ लाख रुपये आणि रब्बीतील ३७ कोटी ४ लाख रुपयांचे उद्दिष्ट आहे. 

व्यापारी बॅंकांना खरिपात ८५९ कोटी १० लाख रुपये आणि रब्बीत १९७ कोटी ७० लाख रुपये असे एकूण १ हजार ५६ कोटी ८० लाख रुपये उद्दिष्ट आहे. महाराष्ट्र ग्रामीण बॅंकेला खरिपात १६० कोटी ९६ लाख रुपये, तर रब्बीत ४० कोटी ४ लाख रुपयांचे उद्दिष्ट आहे. गुरुवार (ता.३०) पर्यंत जिल्हा बॅंकेने २६ शेतकऱ्यांना ७ लाख ९१ हजार रुपये, तर व्यापारी बॅंकांनी ४७ शेतकऱ्यांना ४९ लाख रुपयांचे पीक कर्जवाटप केले, असे सहकार विभागाच्या सूत्रांनी सांगितले.