नाशिक: कोरोनाच्या पार्श्वभूमीवर मजुरटंचाई असल्याने बाजार समित्यांनी कांदा लिलाव प्रक्रियेत बदल करून खुल्या विक्री पद्धतीऐवजी गोणी पद्धतीने लिलाव सुरू केले आहे. पिंपळगाव बसवंत कृषी उत्पन्न बाजार समितीमध्ये १ एप्रिलपासून कामकाज सुरू होऊन शुक्रवारी (ता.३) उच्चांकी ३० हजार गोण्यांची आवक झाली आहे. गर्दी नियंत्रण करून लिलाव प्रक्रिया सुरळीत ठेवण्यात बाजार समिती प्रशासन यशस्वी झाल्याचे पाहायला मिळत आहे. 

कोरोनाचा प्रादुर्भाव होऊ नये यासाठी संचारबंदी लागू आहे. त्यामुळे मजुरटंचाई जाणवू लागल्याने प्रथमच खुल्या पद्धतीऐवजी गोणी पद्धतीला सुरुवात झाली. पहिल्या दिवशी १२ हजार २४० गोणी आवक झाली होती. शुक्रवारी (ता. ३) लाल कांद्याला प्रतिक्विंटल किमान ५०० रुपये, कमाल १,१५१ रुपये तर सर्वसाधारण १,००१ रुपये दर मिळाला. तर उन्हाळ कांद्याला प्रतिक्विंटल किमान ९०० रुपये, कमाल १,७१७ रुपये तर सर्वसाधारण १,४५१ रुपये दर मिळाला. 

जिल्ह्यातील लासलगाव, नांदगाव, नामपूर, सटाणा, चांदवड व सिन्नर येथे लिलाव बंद होते. तर उमराणे बाजार समिती गावात असल्याने तसेच परिसरात रस्ते बंद केल्याने आवक कमी झाल्याचे सूत्रांनी सांगितले.  जिल्ह्यातील बाजार समित्यांमधील कांदा आवक