अकोला : स्पायसेस बोर्ड आॅफ इंडिया (कोची)अंतर्गत नवी मुंबईतील वाशीस्थित सिडको कनव्हेन्शन सेंटरमध्ये मसाला पिकातील उत्पादक, खरेदीदार, विक्रेते, प्रक्रियाधारक तसेच निर्यातदार यांचे एकदिवसीय संमेलन झाले. यामध्ये वाशीम जिल्ह्यातील २२ हळद व इतर मसाला पीक उत्पादक शेतकऱ्यांनी सहभाग घेतला. या कार्यशाळेचे उद्‌घाटक म्हणून स्पायसेट बोर्ड अाॅफ इंडियाचे अध्यक्ष डाॅ. ए. जयतिलक उपस्थित होते.

देशाच्या विविध भागांतून आलेल्या मसाला पीक उत्पादक, विक्रेते, खरीददार, प्रक्रियाधारक तसेच निर्यातदार यांनी आपला संपूर्ण परिचय करून देताना हळद, अद्रक, मिरची, काळेमिरे या व इतर मसाला पिकात देशात अाणि परदेशांत असणारी मागणी, मसाला पिकातील मूल्यवर्धित पदार्थ व त्याबाबत खरेदी विक्रीच्या संधी यावर प्रकाश टाकला.

या कार्यशाळेत करडा कृषी विज्ञान केंद्राच्या वतीने कार्यक्रम समन्वयक डॉ. अार. एल काळे यांच्या मार्गदर्शनात कीटकशास्त्रज्ञ आर. एस. डवरे यांनी प्रतिनिधित्व केले. वाशीम जिल्ह्यातील हळद या महत्त्वाच्या मसाला पिकासंदर्भातील मूल्यवर्धन व निर्यातीच्या संधी तसेच मसाला पीक बाजारपेठ व्यवस्थापनासंदर्भात कृषी विज्ञान केंद्राची तसेच शेतकरी उत्पादक कंपन्यांची भूमिका यावर संवाद साधला.

कृषी विज्ञान केंद्राच्या वतीने पवन बेलोकार व विठ्ठल खैरे या हळद उत्पादक शेतकऱ्यांनी विविध खरेदीदार व निर्यातदार यांच्याशी चर्चा केली. या कार्यशाळेत वाशीम जिल्ह्यातील वनोजा, शेलुखडसे, कोयाळी, लिंगा, पवारवाडी, मोरगव्हाण, आसोला या इतर गावांतील २२ हळद उत्पादक शेतकऱ्यांनी उपस्थिती लावली.