Pune News : आज देशातील बाजारात कापसाच्या भावात काही प्रमाणात सुधारणा दिसून आली. पण कापसाचे भाव वायदे आणि बाजार समित्यांमध्ये अस्थिर आहेत. केवळ भारतातच नाही तर अमेरिका, ब्राझील, ऑस्ट्रेलिया या देशांमध्ये कापूस भावात चढ उतार सुरु आहेत. अमेरिकेच्या कापसाला ब्राझील आणि ऑस्ट्रेलियाच्या कापसामुळे फटका बसतोय.

तर देशात साऊदर्न इंडिया मिल्स असोसिएशन पुन्हा एकदा कापूस बाजारात मिठाचा खडा टाकण्याचं काम करत आहे.   मग अमेरिकेच्या कापसाचं ब्राझील आणि ऑस्ट्रेलिया कनेक्शन काय आहे? देशातील उद्योग नेमकी लाॅबिंग काय करत आहेत? हाच आजचा आपला विषय आहे. 

सुरुवात करूयात कापसाच्या भावापासून. मागील दोन आठवडे कापसाच्या भावातील नरमाई कायम होती. पण आज महत्वाच्या अनेक बाजारांमध्ये कापसाच्या सरासरी भावात क्विंटलमागं ५० ते १०० रुपयांची सुधारणा दिसून आली.

सरासरी भावपातळी आज ७ हजार ३०० ते ७ हजार ७५० रुपयांच्या दरम्यान होती. काही बाजारांमध्ये कमाल भाव ८ हजार २०० रुपयांच्या दरम्यान आहे. तर किमान भाव आजही ७ हजारांपासून सुरु होत आहे. कापसाचे भाव गाव, बाजार समित्या आणि जिनिंगच्या पातळीवर तसेच कापसाच्या गुणवत्तेनुसार कमी जास्त आहेत. 

अमेरिकेच्या कापूस भावावर सध्या काही प्रमाणात ब्राझील आणि ऑस्ट्रेलियाच्या कापसाचा दबाव येत असल्याची चर्चा आहे. कारण यंदा ब्राझीलमध्ये कापूस उत्पादन मोठ्या प्रमाणात वाढणार आहे. तर जुलैपासून येथील कापसाची काढणी सुरु होईल. म्हणजेच कापूस बाजारात येईल. ब्राझीलच्या कापसाचे भावही काही दिवसांपासून काहीसे नरमले. ऑस्ट्रेलियाचा कापूसही याचवेळी बाजारात येईल.

यंदा अमेरिकेचे उत्पादन घटले त्यामुळे आंतरराष्ट्रीय बाजारात भाव सुधारले आहेत. मागणीही चांगली आहे. या दोन्ही देशांचा कापूस बाजारात दाखल झाल्यानंतर पुरवठा वाढेल. यामुळे अमेरिकेच्या वायदे बाजारात कापूस वायद्यांमध्ये पुढच्या महिन्यांतील व्यवहारांमध्ये चढ उतार दिसून येत आहेत. पण सध्या कापसाचा पुरवठा कमी असल्याने भाव त्या प्रमाणात कमी झाले नाहीत. 

साऊदर्न इंडिया मिल्स असोसिएशन पुन्हा एकदा कापूस बाजारात मिठाचा खडा टाकण्याचं काम करत आहे.  कारण या संघटनेने उद्योगांना पुन्हा एकदा चढ्या भावात कापूस खरेदी करू नये, असं आवाहन केलं. तसेच केंद्र सरकार आणि सीओसीपीसी यांच्या कापूस उत्पादन अंदाजावरच विश्वास ठेवावा, कारण हे अंदाज जास्त विश्वासार्ह आहेत, असेही सांगितले.

तसेच सध्या कापूस बाजारात जास्त प्रमाणात सट्टेबाजी होत असल्याने कापसाचा भाव वाढत असल्याचाही दावा या संघटनेने केला. तसेच कापसाला वाढलेल्या भावात मागणी कमी झाल्याचेही सांगितले जात आहे. 

वायद्यांमध्ये कापूस बाजारात चढ उतार सुरु असले तरी बाजार समित्यांमधील भाव आज काही प्रमाणात वाढले. म्हणजेच भावातील नरमाई थांबलेली दिसते. तर दुसरीकडे बाजारातील आवक कमी झाली आणि मागणी चांगली आहे. त्यामुळे दर पुन्हा पूर्वपातळीकडे वाटचाल करताना दिसत आहे. बाजारातील आवक पुन्हा कमी होताना दिसत आहे.

देशातील कापूस उत्पादनाचे अंदाज वाढवल्यानंतर काही दिवस बाजारातील आवक वाढली होती. पण शेतकऱ्यांकडे कापूसच कमी प्रमाणात शिल्लक असल्याने आवक पुन्हा एकदा कमी झाली. कालची देशातील बाजारातील आवक ६३ हजार २०० गाठी होती. तर मागच्या आठवड्यातील आवक ७० हजार गाठींपेक्षा जास्त होती. 

कापसाची देशातील आवक पुढील काळातही कमी होत जाणार आहे. याचा आधार कापूस भावाला मिळेल. निर्यातीसाठीही चांगली मागणी मागणी आहे. याचाही सपोर्ट मिळेल. त्यामुळे कापसाचे भाव एप्रिल महिन्यात पुन्हा सुधारू शकतात. तर मे महिन्यात कापसाचा भाव सध्याच्या पातळीवरून ५ ते ७ टक्के वाढू शकतात, असा अंदाज अभ्यासकांनी व्यक्त केला.