Sindhudurg News : एकीकडे परिपक्व झालेल्या काजू बीच्या दरासाठी सर्वत्र आंदोलन सुरू असताना ओल्या काजूगराला चांगला दर मिळत असल्याचे चित्र आहे. ओल्या काजूगराला शेकडा चारशे रुपये दर मिळत असून ओल्या काजू बीला आकारानुसार २५० ते ३०० रुपयांचा दर मिळत आहे.

सिंधुदुर्ग, रत्नागिरी आणि कोल्हापूर जिल्ह्यांत सध्या काजू बीच्या घसरलेल्या दरावरून आंदोलने सुरू आहेत. काजू बीला प्रतिकिलो २०० रुपये हमीभाव मिळावा यासह विविध मागण्यांसाठी १६ फेब्रुवारीला आंदोलन करण्यात आले.

परिपक्व झालेल्या काजू बीला सध्या १२६ रुपये दर दिला जात आहे. असे असले तरी ओल्या काजू बीला मात्र चांगला दर बाजारपेठेत मिळत आहे. ओल्या काजूगराला शेकडो ३०० ते ४०० रुपये दर मिळत आहे. तर काजू बीला २५० ते ३०० रुपये दर मिळत असल्याचे चित्र जिल्ह्याच्या विविध भागांत आहे.

ओल्या काजूगराला मुंबई, पुणे, कोल्हापूरसह विविध शहरांमध्ये मोठी मागणी आहे. मुंबईमध्ये ओल्या काजूगराला प्रचंड मागणी आहे. त्यामुळे जिल्ह्यातील अनेक काजू उत्पादक आता ओला काजूगर विक्रीवर भर देऊ लागले आहेत.

ओल्या काजू बीतून गर काढण्यासाठी साधारणपणे शेकडा ५० ते ६० रुपये खर्च येतो. त्यामुळे परिपक्व काजू बीपेक्षा ओला काजू विक्री करणे शेतकऱ्यांना परवडत आहे.