Pune News : आफ्रिकेतील देशांमध्ये तुरीची काढणी सुरु झाली. भारताला तुरीसाठी आफ्रिकेचा आता आधार आहे. नुकतेच केंद्र सरकारने मोझांबिकमधील निर्यातदारांना जास्तीत जास्त तूर भारताला निर्यात करण्याचे आवाहन केले होते.

यंदा आफ्रिकेतून भारताला निर्यात वाढण्याचा अंदाज आहे. पण सध्या बाजारातील दर, देशातील तूर पिकाची लागवड आणि पावसाची स्थिती पाहता तुरीच्या भावात फार घट होण्याची शक्यता नाही, असे जाणकारांनी सांगितले.

भारतात आयात होणाऱ्या तुरीमध्ये जवळपास ६० टक्के वाटा म्यानमारचा आहे. तर मोझांबिक जवळपास २१ टक्के तूर भारताला पुरवतो. सुदानमधून ११ टक्के, टंझानियातून ४ टक्के आणि मालावीतून ३ टक्के तूर भारतात आयात होते.

विशेष म्हणजे या देशांमध्ये तुरीचा वापर नगण्यच आहे. हे देश केवळ निर्यातीसाठी तूर लागवड करतात. आफ्रिकेतील तूर काढणीला आली. येथील निर्यातदार भारताला पुढील महिन्यापासून निर्यात वाढवतील, असा अंदाज आहे.

मागील हंगामात भारताने जवळपास ९ लाख टन तूर आयात केली होती. यंदा तूर आयात १० लाख टनांवर नेण्याचा सरकारचा उद्देश आहे. पण तुरीचा एव्हढा पुरवठा झाला पाहीजे. आफ्रिकेतील देश किती तूर लगेच निर्यात करतात हेही पाहावे लागेल. कारण भारताला तुरीची टंचाई जाणवते हे निर्यातदारांना माहित आहे.

त्यामुळे निर्यातदार लगेच पुरवठा वाढविण्याची शक्यता कमी असल्यचे जाणकारांनी सांगितले. भारतात तुरीचे दर वाढत असल्याने आफ्रिका आणि म्यानमार या देशांनीही निर्यातीचे भाव वाढवले आहेत. त्यामुले आफ्रिकेतून तूर लगेच बाजारात येऊन भाव कमी पडण्याची शक्यता दिसत नाही.

देशातील तूर लागवड आतापर्यंत गेल्यावर्षीपेक्षा ८ टक्क्यांनी कमी आहे. देशातील लागवड ३७ लाख हेक्टरवर पोचली. तसेच अनेक तूर उत्पादक भागात पावसाचे प्रमाण कमी जास्त आहे. काही भागात पाऊस जास्त झाला. तर काही भागांमध्ये पाऊस अगदी कमी आहे.

त्यातच महत्वाच्या मराठवाड्यात पावसाचे प्रमाण कमी दिसते. पुढील काळातही पाऊस कमी राहण्याची शक्यता आहे. यामुळे यंदा देशातील तूर उत्पादन गेल्यावर्षीफेक्षाही कमी राहण्याची शक्यता वर्तविली जाते. उत्पादनाचा अंदाज देणे आता घाईचे होईल. पण पिकाची स्थिती पाहून उत्पादन वाढणार नाही, असे जाणकार सांगतात.

सध्या तुरीला प्रतिक्विंटल सरासरी ९ हजार ते १० हजार रुपये भाव मिळतोय. आफ्रिकेतून आयात होणाऱ्या तुरीचे भावही ८ हजार ते ९ हजार रुपये आहेत. आफ्रिकेचा बहुतांशी माल कमी गुणवत्तेचा असतो. यामुळे भावही कमी असतात. आफ्रिकेतील तूर आयात वाढण्याचा अंदाज असला तरी देशातील बाजारात दर फार कमी होण्याची शक्यता सध्या तरी दिसत नाही, असे जाणकारांनी सांगितले.