Nashik Tomato Market: चालू वर्षी उन्हाळी टोमॅटो हंगामामध्ये अगोदर नैसर्गिक आपत्ती, वाढलेली आवक आणि कमी दरामुळे मोठा फटका बसला. तसेच २ ते ३ रुपये किलोने टोमॅटोची विक्री करावी लागली. काही शेतकऱ्यांना तर तोडणी आणि वाहतूक खर्चही निघाला नाही. त्यामुळे अनेक शेतकऱ्यांनी उभ्या लागवडी सोडून दिल्या.

परिणामी आता आवक घटल्याने १०० रुपये किलोवर दर मिळत आहेत. मात्र हा लाभ १० ते १५ टक्के टोमॅटो उत्पादक शेतकऱ्यांना मिळत आहे. तर ८० टक्के शेतकऱ्यांना कोट्यवधी रुपयांचा फटका बसला आहे. त्यामुळे एकीकडे दरवाढ दिसत असली तरी मोठे आर्थिक नुकसान हंगामात झाले आहे.

टोमॅटो तोडे सुरू झाल्यानंतर एप्रिल महिन्यात काहीसे दर टिकून होते. मात्र मे महिन्यात दरात मोठी घसरण दिसून आली. त्यामुळे हतबल काही शेतकऱ्यांनी अक्षरशः गुरे सोडत लागवडी उपटूनही टाकल्या.

मात्र जूननंतर आता बाजारात आवक मोठ्या प्रमाणावर घटल्याने दरात तेजी दिसून येत आहे. राज्यभर किमान ५ रुपयांपासून तर कमाल १०० रुपये प्रति किलोपर्यंत दर मिळत आहेत. तर सरासरी ६० ते ७० रुपये दर आहेत.

यामुळे उत्पादन कमी व आवकेवर परिणाम

टॉमेटो पिकाच्या १५ एप्रिलनंतर लागवडी यशस्वी झालेल्या नाहीत. फूल कळी धारणा अवस्थेत अडचणी आल्या. उन्हाळ्यात कमी होणारी आर्द्रता ही परागीभवनात अडथळा आणत होती. यामुळे सर्व ठिकणी फळधारणा कमी झाली आहे. पानाच्या वाट्या देखील जास्त ठिकाणी झाल्यामुळे फळधारणा व सध्याच्या उत्पादनावर याचा विपरीत परिणाम झाला आहे.

सध्याच्या लागवडीत ५०० ते ८०० क्रेट उत्पादन अपेक्षित आहे, नवीन लागवडी तोडे सुरू व्हायला अजून १ महिना कालावधी आहे, हा मोजक्या उत्पादकांना फायदा मिळणार आहे.सध्या पडत असलेला पाऊस देखील गुणवत्तेत वर विपरीत परिणाम करू शकतो, अशी माहिती के. के. वाघ कृषी महाविद्यालयाचे सहायक प्रा. तुषार उगले यांनी सांगितले.

नाशिक बाजारातील गेल्या ५ महिन्यांतील दरस्थिती

मार्च...२,२४,९१३...२५०...७५०...५००

एप्रिल...४६,६२०...५००...९००...७५०

मे...३१,१७४...१००...५५०....३५०

जून...४,५००...५००...८००...७००

राज्यातील टोमॅटो दर स्थिती (ता. ४ जुलै)

बाजार समिती...आवक...किमान..कमाल...सरासरी

नाशिक...९७८...१,८४०...७,०००...६,०००

कोल्हापूर...७८...१,०००...८,५००...४,७००

छत्रपती संभाजीनगर...५४...५,०००...१०,०००...७,५००

पुणे...९२३...३,०००...१०,०००....७,५००

मोशी (पुणे)...१८६...५,०००...८,०००...६,५००

नागपूर...८००...८,०००...१०,०००...९,५००

सोलापूर...५४१...१,४००...१०,५००...४,३००

(संदर्भ : महाराष्ट्र कृषी पणन मंडळ)