Sangli News: कोकणात संततधार पाऊस सुरू आहे. तिथल्या पानांच्या बाजारपेठा बंद ठेवल्या आहेत. परिणामी, कोकणात पानांचा उठाव कमी झाला आहे. इतर भागांतल्या पेठांमध्ये पानांचा उठाव कमी अधिक प्रमाणात होत आहे. त्यामुळे पानांचे दर दबावात आहेत. सध्या पानांना एका डागाला (एका डागात १२ हजार पाने) एक हजारापासून ते ३५०० रुपयांपर्यंत असा दर आहे. त्यामुळे पान उत्पादक शेतकरी अडचणीत सापडला आहे.

सांगली जिल्ह्यात मे महिन्यात मॉन्सूनपूर्व पावसाने हजेरी लावली. त्यामुळे ऐन हंगामाच्या सुरुवातीला खुडा थांबला होता. त्यानंतर सलग पाऊस सुरू झाला. शेतात पाणी साचून राहिले. नाग वेलीला अपेक्षित फुटवा मिळाला नाही. अशा परिस्थितीतही शेतकऱ्यांनी नागवेली जोपासल्या आहेत. वास्तविक पाहता मे महिन्यात पानांच्या बाजारपेठेत चेन्नईतील विजयवाडा, चिन्नूर, कन्नूर या भागातील पानांची विक्रीसाठी येत नाहीत. परंतु अजूनही या भागातील पाने इथल्या पानांच्या पेठेत विक्रीला येत असल्याचे पान उत्पादक शेतकऱ्यांनी सांगितले. त्याचा परिणाम पानांच्या दरावर झाला असेही शेतकरी सांगतात.

बाजारपेठेत पानांची मागणी आणि उठाव कमी झाला असल्याने पानांचे दर दबावात आहेत. सध्या कळी पानाच्या एका डागाला (एका डागात १२ हजार पाने) २५०० ते ३००० रुपये तर हक्कल पानांच्या एका डागाला १००० ते १२०० रुपये असा दर मिळत आहे. हंगाम सुरू झाल्यापासून पानांचे दर असेच असल्याचे शेतकऱ्यांनी सांगितले आहे.

दर्जेदार पानांना मिळतोय जादा दर

पानमळ्यात चांगली पाने वेचून त्याची विक्री केली जाते. ही पाने दर्जेदार असतात. या पानांना बाजारात चांगले दरही मिळतात. या पानांना प्रति डागाला सरासरी ४ हजार रुपये असा दर मिळतो. परंतु संपूर्ण मळ्यातून दोन ते चार डाग (एक डाग १२ हजार पानांचा) तयार होतात.