Nashik News : मालेगाव येथील फळबाजारात आंब्यापाठोपाठ डाळिंबाचीही आवक वाढली आहे. येथे रोज ६ हजार क्रेटची विक्री होत आहे. घाऊक बाजारात ८० ते ११० रुपयापर्यंत डाळिंब विकला जात आहे. ८० टक्के माल परराज्यात विक्रीसाठी जात आहे.

शेतकरी डाळिंबाची विगतवारी करून चार प्रकार करतात. यात नंबर एक असलेल्या डाळिंबाला दर जास्त मिळतो.

कसमादे परिसरात मोठ्या प्रमाणात डाळिंबाचे पीक घेतले जाते. रोगांचे आक्रमण झाल्याने अनेकांनी डाळिंब बागा उखडून फेकल्या. मात्र डाळिंब सारखा पैसा देणारे नगदी पीक नाही, याची शेतकऱ्यांना वारंवार खात्री झाली आहे. आता हळूहळू शेतकरी पुन्हा डाळिंबाची लागवड करू लागला आहे. डाळिंब हे सात महिन्यात येणारे पीक आहे.

ऑगस्टपासून ते जानेवारीपर्यंत फळबाजारात डाळिंबाची रेलचेल असते. ऑगस्टच्या पहिल्या आठवड्यापासून येथे डाळिंबाची मोठी आवक वाढेल. तरीही भाव स्थिर राहण्याचा अंदाज व्यापाऱ्यांनी वर्तविला आहे.

शहरातून कानपूर, लखनऊ, पंजाब, हरियाना, पटणा, दिल्ली, भोपाळ, मुंबई यासह विविध राज्यांमध्ये व्यापारी डाळिंब विक्रीसाठी पाठवतात. शहरातील पूर्व भागातील बाजारात हलक्या स्वरूपाचा माल विकला जातो.

कसमादे परिसरातील डाळिंबाची गुणवत्ता असल्याने ग्राहक येथील डाळिंबाला पसंती देतात. दोन आठवड्यापूर्वी येथील बाजारात प्रथम दर्जाचा डाळिंब हंगामातील सर्वात उच्चांकी ३ हजार २०० ते ३ हजार ५०० दराने क्रेट विक्री झाला. सध्या ६ हजार कॅरेट डाळिंब विक्री होत आहे.