Pune News : देशात आणि आंतरराष्ट्रीय बाजारात सोयाबीन आणि सोयापेंडेची भावपातळी वाढली. ब्राझीलमध्ये काही भागात पिकाला पोषक स्थिती नाही. यामुळे ही भाववाढ झाल्याचे अभ्यासक सांगतात. आंतरराष्ट्रीय बाजारात एका महिन्यात सोयापेंडेचे भाव २० टक्क्यांनी वाढले. यामुळे भारताकडे मागणी वाढली. परिणामी सोयाबीनची भावपातळी २०० ते ३०० रुपयांनी वाढल्याचेही जाणकारांनी सांगितले.

सोयाबीनच्या भाववाढीला तसे तीन बाजारातील पायाभूत घटक कारणीभूत आहेत. पण तिन्हींच्या मुळाशी एक कारण आहे. ते म्हणजे ब्राझील. ब्राझील हा जगातील महत्त्वाचा सोयाबीन उत्पादक देश. यंदा ब्राझीलमध्ये आतापर्यंतचे विक्रमी सोयाबीन उत्पादन होईल, असा अंदाज आहे.

त्यामुळे आंतरराष्ट्रीय बाजारात सोयाबीनवर दबाव होता. त्याचा परिणाम आपल्या सोयाबीनच्या भावावरही दिसून येत होता. त्यामुळे आपला भाव ४ हजार ५०० रुपयांचा टप्पा पार करत नव्हता. म्हणजेच भाव दबावात राहण्यामागही ब्राझील काही प्रमाणात कारणीभूत होता.

आता ब्राझीलमधील काही सोयाबीन उत्पादक भागात पाऊस नाही. पिकाला पोषक वातावरण नाही. यामुळे ब्राझीलमधील उत्पादन अंदाजापेक्षा कमी राहील, असे अंदाज आहेत. त्यामुळे अमेरिकेच्या सोयाबीनला उठाव वाढला. यामुळे अमेरिकेच्या बाजारात भाव वाढले. सोयापेंडेचे भाव महिनाभरातच जवळपास २० टक्क्यांनी वाढले.

सोयाबीनही १० टक्क्यांनी वाढले. आंतरराष्ट्रीय बाजारात सोयापेंडेचा भाव ३७१ डॉलर प्रतिटनांवरून ४५१ डॉलर प्रतिटनांवर पोचला. आजही अमेरिकेच्या सोयापेंडेचे भाव भारताच्या सोयापेंडपेक्षा कमीच आहेत.

पण आशियातील देशांना सध्याच्या भावात अमेरिकेपेक्षा भारताकडून सोयापेंड घेणे परवडते. त्यामुळे आपल्या शेजारचे आणि आशियातील देश भारताकडून सोयापेंड घेत आहेत. सोयापेंड बंदरावर जवळपास ४६ हजार रुपये प्रतिटनाने मिळत आहे, असे काही निर्यातदारांनी सांगितले.

भारतात सोयातेलाचे भाव दबावात आहेत. पण सोयापेंड निर्यातीला आता मागणी येत असल्याने भावाला आधार मिळत आहे. दोन आठवड्यापूर्वी सोयाबीनचा सरासरी भाव ४ हजार ४०० ते ४ हजार ५०० रुपयांच्या दरम्यान होता.

पण त्यात वाढ होत आता भावपातळी काहीशी सुधारली. सोयाबीनचा सरासरी भाव सध्या ४ हजार ६०० ते ४ हजार ८०० रुपयांच्या दरम्यान पोचला. म्हणजेच दोन आठवड्यांमध्ये सोयाबीनचा सरासरी भाव क्विंटलमागे किमान २०० ते ३०० रुपयांनी वाढला.

तीन लाख टन सोयापेंड निर्यातीचे करार

भारतातील निर्यातदारांनी आतापर्यंत ३ लाख टन सोयापेंड निर्यातीचे करार केले. ही निर्यात नोव्हेंबर आणि डिसेंबर या दोन महिन्यांमध्ये होणार आहे. यापैकी जास्त माल बांगलादेश, इराण, नेपाळ आणि व्हिएतनामला जाणार आहे. भारताकडे केवळ हे चार देशच नाही तर इतरही आशियातील देश सोयापेंडसाठी विचारणा करत आहेत, असे रॉयटर्स या वृत्तसंस्थेने आपल्या एका अहवालात म्हटले आहे.

दर वाढण्याची शक्यता

आंतरराष्ट्रीय बाजारात सोयापेंडचा भाव आणखी वाढण्याचा अंदाज आहे. त्यामुळे भारतीय सोयापेंडेलाही मागणी वाढेल. सोयापेंड निर्यातीचे सौदे पूर्ण करण्यासाठी गाळपासाठी प्रक्रिया प्लांट्सना सोयाबीन खरेदी वाढवावी लागेल.

यंदा उत्पादनात घट आहे. त्यामुळे भावात सुधारणा होऊ शकते. सोयाबीनचा भाव पुढील दोन महिन्यांमध्ये ५ हजार ५०० रुपयांचा टप्पा गाठू शकतो, असा अंदाज सोयाबीन बाजारातील अभ्यासकांनी व्यक्त केला.