Akola News : राज्यात हमीभावाने या हंगामात आतापर्यंत १ कोटी १२ लाख १३,८४८ क्विंटल सोयाबीन खरेदी झाली आहे. मात्र, बऱ्याच ठिकाणी खरेदी केलेले सोयाबीन वेअरहाऊसला साठवले गेलेले नाही. जोपर्यंत हा शेतीमाल वेअरहाऊसमध्ये डिपॉझिट होण्याची प्रक्रिया पार पडणार नाही, तोपर्यंत शेतकऱ्यांचे चुकारेसुद्धा लटकून राहणार आहेत. शिवाय बंपर सोयाबीन खरेदीमुळे आता तूर खरेदीचा मुहूर्तही लांबत चालल्याचेही बोलले जात आहे. केवळ नोंदणीची प्रक्रियाच तेवढी होत आहे.

बाजारात सोयाबीनला चार हजारांच्या आत दर मिळत असल्याने या वर्षी शेतकरी शासकीय खरेदी केंद्राकडे जात आहेत. त्यामुळेच कधी नव्हे ते एक कोटी १२ लाख १३,८४८ क्विंटल सोयाबीन खरेदी झाली आहे. सोयाबीन खरेदी सहा फेब्रुवारीपासून बंद झालेली असून मुदतवाढ होईल किंवा नाही, याबाबत चित्र स्पष्ट झालेले नाही. दुसरीकडे आता तूर खरेदीसाठी शासनाकडे शेतकऱ्यांची मागणी वाढत आहे.

अशा स्थितीत तूर खरेदीची प्रक्रिया नोंदणीच्या अनुषंगाने सुरू झालेली आहे. खरेदीदार एजन्सींना नोंदणी करण्याबाबत सूचना दिलेल्या आहेत. त्यानुसार ही प्रक्रिया सुरू झाली आहे. बाजारपेठेत तुरीला हमीभावापेक्षा कमी दर मिळत असल्याने शासकीय खरेदी केंद्रांची गरज निर्माण झालेली आहे. तूर नोंदणीला सुरुवात होताच नोंदणीला वेग आला आहे. शेतकरी मोठ्या संख्येने नावनोंदणी करू लागले आहेत. राज्यात यंदा तुरीची १२ लाख हेक्टरपेक्षा अधिक क्षेत्रांवर पेरणी झालेली आहे.

वेअरहाऊस तुडूंब भरले

सोयाबीन खरेदीला मोठा प्रतिसाद मिळाल्याने वेअरहाउसमध्ये अनेक ठिकाणी माल साठवायला अनेक दिवसांची प्रतीक्षा आहे. वाहने जागेवरच उभी राहिलेली आहेत. शेतकऱ्यांचे सोयाबीन गोदामात डिपॉझिट झाल्यानंतरच चुकारे मार्गी लागत असतात.

सध्या माल संथ गतीने डिपॉझिट होत असल्याने चुकारे विलंबाने सुरू आहेत. सोयाबीन साठवण्यासाठी वेअरहाउसमध्ये जागा नसताना आता तूर खरेदी सुरू झाल्यानंतर ती साठविण्याचा प्रश्‍न उद्भवण्याची शक्यता खरेदी यंत्रणेतील अधिकारी व्यक्त करीत आहेत. सोयाबीनची विल्हेवाट लावून जागा रिक्त झाली तर तूर ठेवणे शक्य होईल.