Market Bulletin:

कांदा दरात चढ उतार

कांद्याच्या भावात मागील आठवडाभरात काहीसे चढ उतार सुरु झाले. बाजारातील कांदा आवक काही बाजारांमध्ये काहीशी अधिक दिसत आहे. तसेच आंतरराष्ट्रीय बाजारात भारतीय कांद्याला चीन आणि पाकिस्तानच्या कांद्याशी स्पर्धा करावी लागत आहे. या दोन्ही देशांचा कांदा काहीसा स्वस्त असल्याने निर्यातीच्या दरावर परिणाम होत आहे. त्यामुळे बाजारात सध्या कांदा १ हजार ३०० ते १ हजार ६०० रुपयांच्या दरम्यान विकला जात आहे. बाजारातील कांद्याची आवक आणखी काही दिवस कायम राहू शकते. त्यामुळे कांद्याच्या दरातील चढ उतारही कायम राहू शकतात, असा अंदाज कांदा बाजारातील अभ्यासकांनी व्यक्त केला. 

कोथिंबीरच्या दरात सुधारणा

राज्यातील बाजारांमध्ये मागील ३ आठवड्यांपासून कोथिंबरीची आवक कमी होत गेली. पावसामुळे राज्यातील बहुतांशी भागात कोथिंबीर पिकाचे नुकसान झाले. तसेच अनेक भागात लागवडीही खराब झाल्या. परिणामी बाजारातील कोथिंबीरची आवक कमीच आहे. त्यामुळे कोथिंबीरच्या भावात सुधारणा दिसन आली. बाजारात सध्या कोथिंबीरला प्रतिक्विंटल सरासरी ११०० ते १५०० रुपये दर मिळत आहे. तर जुडीला प्रतिशेकडा १० ते ११ रुपये दर मिळत आहे. कोथिंबीरची बाजारातील आवक पुढील काही आठवडे कायम राहू शकते. त्यामुळे दरपातळीही एका मर्यादेत राहू शकते, असा अंदाज व्यापारी व्यक्त करत आहेत. 

ज्वारीचे भाव टिकून

बाजारातील ज्वारीची आवक टिकून आहे. त्यामुळे दरही काहीसे स्थिरावले आहे. ज्वारीचे उत्पादन यंदा वाढले आहे. तसेच इतरही धान्याचे उत्पादन चांगले आहे. त्यामुळे ज्वारीच्या भावावर दबाव आहे. ज्वारीला उठाव आहे. मात्र, पुरवठा चांगला आहे. त्यामुळे दर काहीसे स्थिरावले आहेत, असे व्यापारी सांगत आहेत. सध्या ज्वारीला प्रतिक्विंटल सरासरी २ हजार ५०० ते ३ हजार रुपयांच्या दरम्यान भाव मिळत आहे. ज्वारीची बाजारातील आवक कमी होत आहे. त्यामुळे दरात काहीशी सुधारणा दिसू शकते, असा अंदाज ज्वारी बाजारातील अभ्यासकांनी व्यक्त केला. 

शेवग्यातील तेजी टिकून

बाजारातील शेवग्याची आवक कमीच आहे. त्यामुळे शेवग्याचे भावही तेजीतच आहेत. शेवगा पिकाला यंदा पाऊस आणि बदलत्या वातावरणाचा मोठा तडाखा बसला. त्यामुळे शेवग्याची आवक कमी आणि उठाव चांगला अशी परिस्थिती आहे. त्यामुळे शेवग्याचे भाव तेजीत आहेत. शेवगा आजही ५ हजार ते ६ हजार रुपये प्रतिक्विंटलच्या दरम्यान विकला गेला. शेवग्याची बाजारातील आवक पुढील काळातही कमीच राहण्याचा अंदाज आहे. तर मागणीह टिकून राहील. त्यामुळे शेवग्याचे भाव तेजीतच राहू शकतात, असा अंदाज व्यापारी व्यक्त करत आहेत.

सोयाबीन मंदीतच

देशातील बाजारात सोयाबीनचा भाव मंदीतच आहे. आंतरराष्ट्रीय बाजारात अमेरिकेच्या धोरणामुळे सोयाबीन आणि सोयातेलाच्या भावात सुधारणा दिसून आली. मात्र, त्याचा आधार देशातील सोयाबीन दराला मिळाला नाही. देशात सोयापेंडचे पडलेले दर आणि डीडीजीएसचा पुरेसा साठा यामुळे सोयाबीनचे भाव दबावात आहेत. सध्या सोयाबीनला सरासरी ४ हजार १०० ते ४ हजार ३०० रुपये दर मिळत आहे. नाफेड आणि एनसीसीएफची सोयाबीन विक्री देखील याच दरम्यान सुरु आहे. देशात सोयाबीनचा पुरवठा पुरेसा आहे. त्यामुळे पुढील काही आठवडे सोयाबीनचे दर टिकून राहू शकतात, असा अंदाज सोयाबीन बाजारातील अभ्यासकांनी व्यक्त केला.