Jalgaon News : खानदेशात मका आवकेत मागील चार ते पाच दिवसांत घट झाली आहे. दरातही किंचित सुधारणा दिसत असून, कमाल दरपातळी २२०० रुपये प्रतिक्विंटलपर्यंत पोचली आहे.

मक्याची आवक एप्रिल महिन्यात वेगात सुरू होती. या महिन्यात खानदेशातील प्रमुख बाजारांत रोज प्रतिदिन सरासरी सहा हजार क्विंटल मक्याची आवक झाली. सर्वाधिक आवक जळगाव, चोपडा, अमळनेर या भागात सुरू होती.

या महिन्यातही एक ते सहा तारखेदरम्यान चांगली आवक झाली. परंतु मागील चार ते पाच दिवसांत सर्वत्र आवक कमी झाली आहे. सात ते आठ दिवसांपूर्वी मक्याचे दर बाजारांत प्रतिक्विंटल १८०० ते २१०० रुपये प्रतिक्विंटल, असे होते.

थेट किंवा शिवार खरेदीत कमाल दर २०५० रुपये प्रतिक्विंटल असे काही खरेदीदार, एजंट देत होते. परंतु जशी आवक कमी झाली तसे दर २२०० रुपये प्रतिक्विंटलपर्यंत पोचले आहेत.

जळगाव, चोपडा, अमळनेर येथील बाजारांत मिळून रोज अडीच हजार क्विंटल मक्याची आवक होत आहे. धुळ्यातील शिरपूर, नंदुरबारातील नंदुरबार व शहादा येथेही आवक होत आहे.