Pune News: डाॅलरच्या तुलनेत रुपयाचे मूल्य कमी होत असल्याने आयात मालाचेही भाव वाढत आहेत. खाद्यतेलाचे भावही किलोमागे ५ ते ६ रुपयांपर्यंत वाढले आहेत. पामतेल, सोयातेल, सूर्यफुल तेल आणि सरकी तेलाचेही भाव वाढले आहेत. तसेच आयात फळे, भाजीपाला, सुकामेव्याचेही भाव वाढले आहेत.

घसरत्या रुपयामुळे देशात खाद्यतेल आणि आयात फळांच्या तसेच सुकामेव्याच्या किमती वाढत आहेत. डाॅलरच्या तुलनेत रुपयाचे मूल्य दिवसेंदिवस कमी होत आहे. एका डाॅलरसाठी आज (ता.१३) ८६.८८ रुपये मोजावे लागत आहे. रुपयाचे मूल्य कमी झाल्यामुळे आयात महाग झाली. कारण डाॅलरचे मूल्य वाढले. तर निर्यात स्वस्त झाली. कारण रुपया स्वस्त झाला. ही परिस्थिती देशाच्या निर्यातीसाठी चांगली असली तरी आयात माल महाग होत आहे. याचा चटके ग्राहकांना बसत आहेत.

भारत गरजेच्या जवळपास ६० टक्के खाद्यतेल आयात करतो. मागील १५ दिवसांमध्येच घसरत्या रुपयामुळे खाद्यतेलाचे भाव किलोमागे ५ ते ६ रुपयांनी वाढले आहेत. पामतेल १५ दिवसांपुर्वी १४० रुपये किलोने मिळत होते. ते आता १४६ रुपयाने मिळत आहे. सोयाबीन तेल १२८ रुपयांवरून १३५ रुपये किलोवर पोचले आहेत.

सूर्यफुल तेलाचे भावही ५ रुपयाने वाढून १५८ रुपये झाले. भूईमूग तेलाचे भाव २ रुपयाने वाढले असून १८५ रुपये झाले. सरकी तेल ६ रुपयाने महाग झाले. एक किलो सरकी तेल १३१ रुपयाने मिळत आहे. मोहरी तेलाचे भावही ३ रुपयाने वाढून १६६ रुपये झाले आहेत. खाद्यतेलाचे भाव वाढल्याने ग्राहकांना मात्र महागाईचे चटके बसत आहेत.

तसेच आयात होणाऱ्या किवी, अवोकॅडो, पिअर्स, प्रिमिअम सफरचंद, सुकामेव्याचे भाव वाढले आहेत. अवोकॅडोचे भाव जवळपास २२ टक्क्यांनी वाढले असून ४४० रुपयांवर पोचले आहेत. प्रिमिअम सफरचंदाचे भाव ८ ते १० टक्क्यांनी वाढले आहेत. तसेच किवी, अवोकॅडो, पिअर्स, बेरिजचे भावही १० ते १५ टक्क्यांनी वाढले आहेत. यापुढील काळात रुपयाचे मूल्य कमी झाल्यानंतर भाव आणखी कमी होण्याची शक्यता आहे, असे आयातदारांनी सांगितले.

डिसेंबर महिन्यात आंतरराष्ट्रीय बाजारात खाद्यतेलाचे भाव कमी झाल्यानंतर ग्राहकांना काहीसा दिलासा मिळाला होता. खाद्यतेलाचे भाव कमी झाले होते. मात्र रुपयाचे मूल्य कमी झाल्यानंतर पुन्हा एकदा महागाईची झळ बसत आहे. तसेच भारत आयातीवर अवलंबून असलेल्या फळे, भाजीपाला आणि सुकामेव्याचे भावही वाढल्याने ग्राहकांवर अतिरिक्त बोजा वाढत आहे.