Cashew Market Update काजू बी (Cashewnut) अपेक्षित उठाव न मिळाल्यामुळे मागील आठवड्यात काहीसा वाढलेला दर (Cashew Rate) पुन्हा घसरला आहे. सध्या काही व्यापारी प्रतिकिलो १०० ते १०५ रुपयांनी काजू बी खरेदी करीत आहेत.

जिल्ह्यात फेब्रुवारीपासून काजू हंगाम सुरू झाला. सुरुवातीला अत्यल्प प्रमाणात काजू बी बाजारपेठेत आली. त्यामुळे सुरुवातीला अवघ्या ११५ रुपयांनी काजू बी खरेदी केली जात होती. परंतु बाजारपेठेत अपेक्षेप्रमाणे आवक न झाल्याने काजू बी चा दर वाढत तो प्रतिकिलो १३० पर्यंत पोहोचला होता.

त्यानंतर मार्चमध्ये काजू बीची आवक मोठ्या प्रमाणात वाढली. दररोज शेकडो टन बी आठवडा बाजारांमध्ये विक्रीकरीता येऊ लागली. काजू बी आवक आणि त्या तुलनेत व्यापाऱ्यांकडे कारखानदारांकडून नसलेली मागणी यामुळे काजू बीच्या दरात घसरण होत गेली. पंधरा दिवसांपूर्वी हा दर अवघ्या १०० रुपयांवर आला होता. त्यानंतर आठ दिवसांनी पुन्हा पाच ते दहा रुपयांनी काजू बीच्या दरात वाढ झाली.

परंतु आता पुन्हा दरात घसरण झाली आहे. व्यापाऱ्यांनी खरेदी केलेल्या शेकडो टन मालाला उठाव नसल्यामुळे व्यापारीदेखील काहीसे कोड्यात सापडले आहेत. त्यामुळे काही व्यापारी प्रतिकिलो १०० ते १०५ रुपयांनी काजू बीची खरेदी करीत आहेत.

काजूचा हंगाम जरी संपला असला तरी अजूनही काजू उत्पादकांकडे शेकडो टन माल शिल्लक आहे. हे उत्पादक दर वाढण्याच्या प्रतीक्षेत आहेत. परंतु प्रत्यक्षात दर दिवसेंदिवस कमी होत आहे.