Nagpur News : बाजारात अधिक वजनाच्या पक्ष्यांचा पुरवठा करीत बाजारात आवक वाढती आणि मागणी कमी असल्याचे चित्र निर्माण करत करारावरील कुक्‍कुपालन करणाऱ्या कंपनीकडून कृत्रिमपद्धतीने दर पाडले जात असल्याचा आरोप शेतीपूरक पोल्ट्री व्यवसाय करणाऱ्या पशुपालकांकडून करण्यात येत आहे.

त्या पार्श्‍वभूमीवर अशा प्रकरणात राज्य सरकारच्या पशुसंवर्धन विभागाने हस्तक्षेप करीत तोडगा काढावा, अशी मागणी पशुपालकांकडून होत आहे. सध्या राज्यात घाऊक पक्ष्यांचे दर प्रतिकिलो ४५ ते ५० रुपयांवर आहेत.

राज्यात सुमारे ९ लाखावर पोल्ट्री व्यवसायिक आहेत. शेतीला पूरक व्यवसाय म्हणून स्वतंत्र त्यासोबतच कंपन्यांकडून पक्षी, औषधे आणि खाद्य घेत करारावर हा व्यवसाय करणाऱ्यांचादेखील यामध्ये समावेश आहे.

दरम्यान कंपन्यांकडून अधिक नफा कमविण्याच्या उद्देशाने जादा वजनाचे पक्षी बाजारात विक्रीसाठी आणले जात आहेत. यामुळे बाजारात आवक अधिक आणि त्या तुलनेत मागणी कमी असल्याचे चित्र निर्माण होते, यातूनच बाजार गडगडतो.

सध्या घाऊक बाजारात पक्ष्यांची उचल अवघ्या ४५ ते ५० रुपये किलो दराने होत आहे. त्या तुलनेत उत्पादकता खर्च मात्र प्रतिकिलो ९० रुपये आहे. परिणामी उत्पादकता खर्चाच्या तुलनेत निम्म्या दरानेच पक्ष्यांची विक्री होत असल्याने पशुपालक हवालदिल झाले आहेत. गेल्यावर्षी पक्ष्यांचे घाऊक दर १२० रुपये किलो होते. या वेळी मात्र १०० रुपयांपेक्षा कमी दराने याचे व्यवहार होत आहेत.