Jalgaon News : खानदेशात केळीची लागवड यंदा वाढली आहे. कंदांसह रोपांना मोठी मागणी आहे. यातच अनेकांनी लागवड उरकली आहे. रोपांचा पुरवठादेखील करून घेतला आहे. सध्या कंदांचा पुरवठा अधिक व लागवडीचे कामकाजे बंद अशी स्थिती असल्याने कंदांचे दर घसरले असून, ग्रॅण्ड नैन वाणाच्या उतिसंवर्धित (टिश्यू) रोपांच्या केळी बागांमधील कंदांचे दर प्रतिकंद तीन रुपयांपर्यंत आहेत.

ग्रॅण्ड नैन वाणाच्या उतिसंवर्धित (टिश्यू) रोपांच्या केळी बागांमधील कंदांना खानदेशात कांदेबाग केळी लागवडीसाठी मोठी मागणी होती. ही मागणी मागील आठवड्यातही बऱ्यापैकी होती. परंतु या आठवड्यात कंदांचे दर घसरले आहेत. प्रतिकूल स्थिती, पाऊस, केळी लागवडीबाबत शेतकऱ्यांनी पुढे ढकललेले नियोजन व कंदांचा अधिकचा पुरवठा यामुळे दरात घसरण झाली आहे.

मागील पंधरवड्यात ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर प्रतिकंद चार ते पाच रुपये असे होते. यात केळी कंद काढण्याची मजुरी व शेतकऱ्याने कंद वाहतुकीसाठी आणलेल्या वाहनात कंद भरून देण्याची जबाबदारी कंद मालकाकडे होती. परंतु मागील चार ते पाच दिवसांत ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर घसरले आहेत.

अनेक कंद मालक किंवा पुरवठादार शेतकरी प्रतिकंद तीन रुपये दर घेऊ लागले आहेत. तर काही शेतकरी अडीच रुपये प्रतिकंद असे दर घेण्याची तयारीदेखील दाखवित आहेत. कांदेबाग केळी लागवडीचा काळ हा सप्टेंबर, ऑक्टोबर या महिन्यात अनुकूल मानला जातो. नोव्हेंबरमध्ये उशिराच्या बागांची लागवड केली जाते.

परंतु पावसामुळे लागवड रखडली. १० ते १२ दिवस लागवडीला उशिर होईल, हे लक्षात घेऊन अनेक शेतकऱ्यांनी केळीची लागवड टाळण्याचे निश्चित केले आहे. अनेक शेतकरी आता फेब्रुवारी व मार्च महिन्यात केळी बागांची लागवड करतील, असेही दिसत आहे.

कंदांची जाहीरात वेगात

तूर्त केळी लागवड कमी करण्याचे किंवा पुढे करण्याचे नियोजन शेतकऱ्यांनी करताच कंद पुरवठादार, एजंट, कंद मालकांनी सोशल मीडियात आपल्या कंदांचे दर व इतर माहितीची जाहिरात प्रसारित करण्यास सुरुवात केली आहे.

ग्रॅण्ड नैन वाणाच्या उतिसंवर्धित रोपांच्या केळी बागांमधील कंदांचे दर कमी दरात व वेळेत दिले जातील, आपली आगाऊ नोंदणी करून घ्या, असे संदेश सोशल मीडियात मागील दोन दिवसांपासून फिरू लागले आहेत.