Banana Seedling : खानदेशात केळी रोपांना मोठी मागणी

Jalgaon News : खानदेशात मृग बहरात लागवडीसंबंधी उतिसंवर्धित केळी रोपांची मोठी मागणी आहे. काही कंपन्यांची रोपांसंबंधीची आगाऊ नोंदणी पूर्ण झाली आहे. अर्थात, पुढे केळी लागवड काहीशी वाढेल, असेही संकेत आहेत.

केळी पिकाचा समावेश रोजगार हमी योजनेत केल्याने लागवडीपासून ते काढणीपर्यंत अनुदान मिळणार आहे. तसेच केळी वगळता इतर पिकांचे दर मागील काही महिने अल्पच आहेत. इतर पिकांत नफा नाही.

यामुळे अनेकांनी केळी लागवडीचे नियोजन केले आहे. जिल्ह्यात बारमाही केळीची लागवड केली जाते. त्यात मृग बहर व आगाप मृग बहर लागवड अधिक असते. ही लागवड यंदा ४० हजार हेक्टरपेक्षा अधिक राहील, असे दिसत आहे. आगाप मृग बहर लागवड एप्रिल ते मे महिन्यात केली जाते. तसेच नियमित लागवडी जून व जुलैत केल्या जातात. काही शेतकरी उशिराच्या लागवडीसही पसंती देतात.

ही लागवड ऑगस्टमध्येही केली जाते. तसेच कांदेबाग केळीची लागवडदेखील खानदेशात यंदा काहीशी वाढेल, असे दिसत आहे. ही लागवड चोपडा, जळगाव, जामनेर, यावल, पाचोरा, धुळ्यातील शिरपूर भागात अधिक असते. ही लागवडदेखील एकूण २५ हजार हेक्टरपेक्षा अधिक राहील, असे दिसत आहे.

सध्या केळी कंदांचाही तुटवडा आहे. अर्थात, खानदेशात केळीची एकूण लागवड ७० हजार हेक्टरपेक्षा अधिक असणार आहे. यात रोपांचाही मोठा वापर लागवडीसाठी केला जाईल, असे दिसत आहे.

रोपांना नऊ ते १६ रुपयांपर्यंत दर

पुढे मृग बहरात लागवडीसाठी सुमारे तीन कोटी उतिसंवर्धित रोपांची आगाऊ नोंदणी खानदेशात झाली आहे. एकूण आठ कंपन्या खानदेशात केळी रोपांचा पुरवठा करतात. सर्वच कंपन्यांकडे केळी रोपांसंबंधीची आगाऊ नोंदणी सुरू आहे.

रोपांची मागणी अधिक व उत्पादन खर्च ही बाब लक्षात घेता काही कंपन्यांनी रोपांचे दर एक रुपयांनी वाढविले आहेत. हे दर पुढे मृग बहर हंगामासाठी लागू असतील. विविध कंपन्यांचे केळी रोपांचे दर नऊ रुपयांपासून ते १६ रुपयांपर्यंत आहेत. सध्या केळी रोपांची लागवड जळगाव, चोपडा, जामनेर, धुळ्यातील शिरपूर भागांत सुरू आहे, असे सांगण्यात आले.