Jalgaon News: उत्तरेकडून मोठी मागणी असतानाच उत्पादन कमी दिसत असल्याने खानदेशात पपई दरात सुधारणा झाली आहे. जागेवर किंवा शिवार खरेदीत शेतकऱ्यांना १६ ते १८ रुपये प्रतिकिलो दर मिळत आहे.

सध्या दर्जेदार पपई खानदेशात कमी उपलब्ध आहे. बाजारात पपईची आवक कमी झाली. उत्पादन हवे तसे नसताना कमी दर दिले जात असल्याचा मुद्दा नंदुरबार, धुळ्यात एप्रिल व मेमध्ये चर्चेत होता. पण आवक कमी राहिल्याने दराचा तिढा यंदा फारसा नव्हता. डिसेंबर व जानेवारीत पपईची मागणी होती.

तसेच दर जागेवर प्रति किलो १२ ते १४ रुपये एवढा त्या वेळेस मिळाला. पण दर एप्रिल व मेमध्ये कमी झाले. या कालावधीत अनेकांचे पीक संपुष्टात आले.

आता श्रावणमास व अन्य कारणांमुळे पपईला मागणी आहे. दुसरीकडे खानदेशात बाजारात पपईची आवक कमी आहे. सध्या रोज सात ते आठ ट्रक (एक ट्रक १६ टन क्षमता) पपईची आवक होत आहे.

राज्यातील बाजारातही पपईची मागणी आहे. उत्तर भारतातूनही मागणी आहे. यामुळे पपई दरात किलोमागे दोन ते तीन रुपयांची सुधारणा झाली आहे. कमाल दर १८ रुपये प्रतिकिलोपर्यंत पोहोचले आहेत. पपईची खरेदी सध्या पंजाब, हरियाना, काश्मीर, उत्तर प्रदेश, राजस्थान आदी भागांतील खरेदीदार खानदेशातील एजंटच्या मदतीने करीत आहेत.