Nagpur News : देशांतर्गत बाजारपेठेत तुटवडा आणि प्रक्रिया उद्योग, कापड उद्योग, इथेनॉलसह, पोल्ट्री उद्योगाची वाढती मागणी अशा कारणाआड गेल्या आठवडाभरापासून मका दर तेजीत आले होते. राज्याच्या काही भागांत २९०० ते ३००० रुपये क्‍विंटलने मका विक्री झाली. आता मात्र १५० ते २५० रुपयांनी घट नोंदविली गेली आहे. २६०० ते २६५० रुपये क्‍विंटलने सध्या मक्‍याचे व्यवहार होत आहेत.

देशात दरवर्षी ३५० ते ३८० लाख टन मक्‍याचे उत्पादन होते. तर देशांतर्गत तक्‍याची मागणी ४०० लाख टन आहे. त्यामुळे दरवर्षी मक्‍याचा काही प्रमाणात तुटवडा निर्माण होते, अशी स्थिती आहे. असे असले तरी देशाच्या कोणत्या ना कोणत्या राज्यात जवळपास वर्षभर मक्‍याची लागवड होते. त्यामुळे मागणी, पुरवठ्याची साखळी वर्षभर सुरू असते.

पावसाळ्याच्या पहिल्या टप्प्यात दरवर्षी बिहारमधील मका देशभराची गरज पूर्ण करतो. बिहार सरकारने जैवइंधनाला प्रोत्साहन दिले आहे. त्यामुळे त्याच भागातून मक्‍याला मागणी वाढली आहे. साधारणतः १७ ते १८ रुपये किलोने विकल्या जाणारा मका त्या भागात २२ ते २३ रुपये किलोवर आला आहे. देशभरात कुक्‍कुट व्यावसायिक पशुखाद्यात याचा वापर करतात. त्याचाही परिणाम दरावर झाला आहे. मक्‍याला पर्याय म्हणून तांदूळ चुरीच वापर पशुखाद्यात होतो.

यंदा तांदूळ चुरीचे व्यवहार २२०० ते २३०० रुपयांनी होत असल्याचे पोल्ट्री व्यावसायिकांनी सांगितले. तांदूळ चुरीचा देखील तुटवडा भासवीत दरात तेजी आणण्यात आली आहे. अशातच आता अचानक मका दरात घसरण नोंदविली गेली आहे. सुरुवातीला तुटवडा असल्याचे भासवीत जादा दराने विक्री करणारे व्यापारी आता २६०० ते २६५० रुपयांनी वाटेल तितका मका पुरविण्यास तयार असल्याचे पोल्ट्री व्यावसायिकांनी सांगितले.

व्यापाऱ्यांनी मक्‍याची साठेबाजी केल्याची शक्‍यता वर्तविली गेली असून, त्यामुळे देखील यापूर्वी दर वधारल्याचे सांगितले जाते. हिंदी भाषिकांच्या श्रावणामुळे मांस आणि अंडी मागणीत घट झाली आहे. कमी पक्ष्यांच्या बॅचेस पोल्ट्री व्यावसायिक घेत आहेत. त्याचाही परिणाम पशुखाद्याच्या मागणीवर झाला असल्याने मका दर प्रभावित झाले आहेत.