Pune News: राज्यातील साखर कारखान्यांच्या कामगारांना १० टक्के वेतनवाढ देण्याचा प्रस्ताव सर्वानुमते मान्य करण्यात आला आहे. या प्रश्नी माजी केंद्रीय कृषिमंत्री शरद पवार यांनी यशस्वी तोडगा काढला, अशी माहिती सूत्रांनी दिली.

कामगारांना पाचवर्षीय वेतनवाढ देण्यासाठी त्रिपक्षीय समिती नेमली जाते. मागील वेतनवाढीचा कालावधी गेल्या वर्षीच समाप्त झाला. त्यामुळे २०२९ पर्यंतची सुधारित वेतनवाढ सूचविण्यासाठी राज्य शासनाने समिती नेमली होती. यात कारखानदार, कामगार, शासकीय प्रतिनिधींचा समावेश होता. समितीच्या चार बैठका होऊनही तोडगा निघत नव्हता.

महाराष्ट्र राज्य सहकारी साखर कारखाने संघाच्या म्हणण्यानुसार, कामगारांनी १८ टक्के वेतनवाढीची मागणी केली होती. मात्र, तोडगा निघत नव्हता. गेल्या चार दशकांपासून वेतनवाढीच्या निर्णयावर श्री. पवार यांच्याकडूनच तोडगा काढला जातो.

त्यामुळे यंदाही श्री. पवार यांनी मार्ग सूचवावा, अशी भूमिका दोन्ही बाजुंच्या प्रतिनिधींनी घेतली. त्यामुळे श्री. पवार यांच्यासमवेत त्रिपक्षीय प्रतिनिधींची सोमवारी (ता. १४) बैठक झाली.

सर्वांची बाजू ऐकून घेत श्री. पवार यांनी अखेर दहा टक्के वेतनवाढ देण्याचा प्रस्ताव ठेवला. या प्रस्तावाला सर्वांकडून मान्यता मिळाली. वेतनवाढीची समस्या संपुष्टात आल्यामुळे साखर उद्योगातून समाधान व्यक्त केले जात आहे.